الجمعة، أكتوبر ١٧

نـحــو عــالــم تــدويــن أفــضــل

التدوين ده عالم جميل وظريف وعلشان يفضل عالم جميل لأزم يبقي في حاجات تحكمه ، مش بمعني تقيد حريت المدونين وتقيد أفكار الناس إلي بتكتب ولكن تضع ضوابط وقواعد لكل واحد يفكر إنه يبقي مدون ، علشان يبقي صعب إختراق هذا المجتمع الجميل
وعلشان كده حقول الحاجات الجميله والحاجات السيئة في عالم التدوين علشان نستفيد منها
يلا نبتدي وطبعا حنبتدي بالإيجابيات علشان نرفع المعنويات

أولاً : حاجات جميله في التدوين ويا ريت تبقي جميلة علي طول



1- روح الترابط والإخوه إللي موجودة بين المدونين وبعضهم

2- التشجيع المستمر بين المدونين وبعضهم وتحفيزهم لبعض علي الإستمرار والإبداع والنشاط والتواصل

3- لما حد بيغيب كل الناس بتفتقده وبتسال عليه ، ودي طبعا بيحسسني إن الرابطه بين المدونين كبيرة جداً

4- لما يكون في حد عنده مشكله بنوجهه وبننصحه للصح ، ولما بيطلب العون بيلاقي الناس كلها جنبه وبتساعده

5- التدوين عملية ربط بين جميع أطراف العرب في جميع انحاء العالم وقربت الشعوب من بعضها وخلتهم يتعرفوا علي

بعضهم أكتر وعلي عادات وتقاليد كل بلد

6- حسست الناس اللي في الغربه إنهم مش لوحدهم وإن في ناس واقفه جنبهم وبتتمني لهم الخير


ثانيا : حاجات بتخنقني وبتخليني أزهق وببقي بقول في نفسي لو شفت واحد مدون حديله بوكس أخليه يفكر مليون مرة قبل ما يفكر يعمل الحاجات دي



1- تـعـليـقـات الـمـجــامــلــة

تلاقي تعليقات كتيرة بتجامل وخلاص ودي لو دلت علي حاجه فبدل علي أن
إلي بيعلق مقراش أصلا الموضوع ، وبعدين الموضوعات مكتوبه علشان نستفاد منها ونتناقش فيها مش علشان نرد وخلاص


2- عـــدم متـابـعــه الـتـعـليـقـات

بمعني أن لو واحد طرح موضوع أو رد علي موضوع وكتب رائيه في التعليق ، وصاحب المدونة يرد عليه ويحاول يفهمه بس للأسف إلي بيستفسر أو بيناقش صاحب المدونة في إلي كتبه مش بيتابع الرد وبيكبر دماغه


3- تســلط أصـحـــاب الـمـدونــات

بمعني أن صاحب المدونة بيتسلط علي من يقولون رائيهم في الموضوعات إلي بكتبوها ، وأول ما وأحد يقول رائي عكس رائيهم تلاقيه قام وأعلن الحرب وطلع كل الكلمات الجارحه والغير جارحه علشان ينقض علي هذا الدخيل الذي سولت له نفسه نقض الموضوع وسولت له نفسه تحدي صاحب المدونة

4- التـعليقات الـبــارده

أه والله مينفعش يتقال عليها غير كده تلاقي واحد كاتب موضوع قيم وطويل وفيه حاجات جميله وأفكار حلوه , وتلاقي واحد غلس كاتب رد بارد وملهوش أي لازمه ولا اي فايدة للموضوع إلي بيرد عليه ، ومحدش بيستفاد منه خالص يعني من الأخر يوفر وقته ونظره وصحته ويروح يصلي له ركعتين أحسن

5- الـمـدونـيـن الـمصلحـجـية

دي حاجه محيراني وبجد مستغرب ليها لما بعلق علي مدونات الرجالة مفيش حد بيعبرني خالص وفي ناس مش بتعبرني لما بكتب تعليق علي مدونة فبيرد علي البنات وينفض للرجاله
وطبعا النوع ده من الناس دخلوا المدونات مش علشان يفيدوا الناس بتجاربهم ويستفيدوا من تجارب الأخرين . الناس دي داخلين بس علشان يعاكسوا البنات وياخدوا إيملات وحب وبطيخ وخلاص

6- المـوضــوعــات الـتـافـهــة

في أوقات بلاقي ناس كاتبه مواضيع تافهه قوي ومفهاش اي استفادة خالص والاقي ناس كتيرة بتعلق وخلاص ليه تهدر وقتك وتهدر حبرك وترد علي حاجه انت مش مقتنع بيها او مفهاش اي فايدة



7- الــهـــروب الـكـبـيـر

موضوع إن كل واحد يزهق يقول إنه حايسيب التدوين انا مش بسميه زهق ، انا بسميه هروب ، لأن اللي يمشي بمزاجه وبإرادته يبقي بيهرب واللي يسيب حاجه ويمنع عن الناس تجربته وخبرته وقلمه يبقي بيهرب كأنه هارب من ميدان المعركة ، وكأنه خاين للأمانة العلمية وهايتحاسب عليها يوم القيامة



8- مــدونــات الشــواذ والـمـثـلـيـيـن
انتشار مدونات الشواذ والمثليين والناس دي لأزم نقف لهم ومندخلش مدونتهم ولو علقوا عندنا نحذف تعلقتهم ونكتب مواضيع في مدونتنا بتهجمهم وتنصحهم في نفس الوقت أن هم يرجعوا عن اللي هما فيه , لأنهم مش بيسئيوا لنفسهم وبس ولكن بيسئيوا لعالم التدوين اللي هو أحنا



9- الــمـدونـيـن الـهــدامـيـن
الناس اللي شغاله هجوم علي البلد وعلي إلي فيها ودي أهم حاجه في الموضوع دا كله ، يا جماعه هي البلد دي مفهاش غير الخراب والدمار والسرقة والنصب ، انتوا كده بتزرعوا روح الأنهزاميه بين الشباب وروح كره البلد وبتشجعوهم علي الخراب ، يا عالم يا هووووو إرحمونا مش كفايه اللي ماسكينها خربوها أحنا كمان هنخربها

10- مــدونـيـن الأنـهـزامـيـة
في ناس بينشروا بين الشباب أفكار هدامه وسلوكيات وألفاظ بتجرنا إلي الاسفل ، ونلاقي نفسنا مع مرور الوقت بقت السلوكيات دي حاجه عاديه .
مثلا زي الموضوعات إلي بتغلط في البلد ، بتدي أنطباع عند الناس أن هم ميتكلموش وواحده وحده نلاقي نفسنا أخدنا الطابع ده ومعدش عندنا أي غيره علي البلد ولما نلاقي الغلط قدمنا منتحركش علشان نغيره ونقول في نفسنا هي خربانه خربانه

مــلــحــوظـــة
أنا بقول وجهة نظري مش بالضرورة تكون صح ومش بالضرورة تكون ملزمة لكل الناس بس أنا قولت رائي علشان العالم ده يهمني ونفسي الاقيه بيرتقي بالناس إللي فيه مش ينزل بيهم لتحت
وإللي عنده حاجه مش عجباه أو حاجه عجباه يكتبها علشان نلخصها في موضوع واحد ونسميها وثيقة عالم التدوين وننشرها علشان الناس كلها تعرف اسس ومبادئ التدوين وتلتزم بيها
الوثيقة دي مش بتقيد التدوين ولا الأفكار ولكن بتقيد الحاجات الجارحه إلي بتقلل من التدوين وبتقلل من قيمة الناس الموجودة فيه




امــضــاء

مجنووون


62 نورت مستشفي المجانين:

كـــيــــــــارا يقول...

موضوع هااااااااااااام جدا

ةاكيد ليا عوده للرد

بسجل حضوووووووووري :)

mahasen saber يقول...

كلامك فى الغالب وبنسبه كبيره مضبوط وعارف يا مج اكترحاجه او اقتراح قلته وعجبنى موضوع مدونات الشواذ وده لانى كنت فى حيره من امرى ما بين حرية الهوى والسلوك وحرية الشخص انه يعمل اليى عايزه وحرمانية الدين وقناعتى الشخصيه بان ده شئ بيغضب ربنا ومقزز وان الشواذ بخلاف انهم بيخالفوا الطبيعه الا ان افكارهم هدامه ...
وبصراحه اليى كان مخلينى فى الحيره دى ان مدونه معروفه كنا بنعلق عند بعض وبهتم بموضوعتها جدا لانها فى الغالب بتدعوا لاعتدال الدين وبتهاجم التشدد وبعدين شخص معرفوش بس اكيد زميل عزيز قالى انها شاذه وانى ازاى بعلق عندها وبصراحه انا استغربت ودخلت فرزت مدونتها واتاكدت انها كده بعدين قلت لا دى حريه شخصيه وهيا حره طالما مش بتاذينى بشئ بعدين فضلت فى حيره وسالت اخوه مدونيين كتيريعنى بالضبط خدت راى 3 منهم وبعدين جالى تعليق من شاذ فقرفت ومسحت التعليق وقلت انا ليه بقيس الامور بمقياسين ما دا كده وهيا كده فاخدت قرارى ان افضل شئ ادعيلهم بالهدى وانصحهم واتجنبهم لانى فعلا بعتقد لو الشخص اليى بيعمل حاجه غلط لقينا برضه بنتحاور معاه وبناقشه ومش نبذناه اعتقد بشده انه هيفضل على الغلط ده
والله اعلم
بس النقطه دى فى كلامك كانت شاغلانى جدا جدا وانا بصراحه كنت فى حيره لانى كنت بحترم الانسانه دى بس كمدونه وبوستات واراء فى الغالب بتعجبنى بس ضميرى كان بياكلنى قوى وانا فى مدونتها مع احترامى ليها وربنا يهديها ويهدينا ويهدى الجميع
والف شكر يا مج على الموضوع المهم ده انا مستنياه بصراحه من امبارح...
بس يستاهل الانتظار...

ANGHAM ALLAM يقول...

كلامك صح
بس ياريت مكونش من الناس دي
و الاااااااااااااا

Sweet Violet يقول...

اولا احب اشكرك على طرح الموضوع دا لانه فعلا مهم

الحاجات الجميله اللى انت ذكرتها عن التدوين مافيش اختلاف عليها طبعا

نيجى بقى للحاجات اللى بتخنق فى التدوين

موضوع التعليقات والمجامله دى انا بعتقد انه اللى بيعمل كدا مجرد بس عشان

ينشر مدونته مش اكتر فاكيد مش هانستنى من حد كدا انه يناقش معنا

الموضوع ..و اعتقد ان الحل الوحيد معه ان اللى يعلق عنده كدا مايروحش ليه

علشان يعرف ان مش بالمجامله المدونه هاتتعرف بالعكس بالاسلوب والنقاش

و الفكر بتاعه بكدا مدونته هاتكون ليها زوار

عدم متابعه التعليقات اكتر حاجه بتخنقنى الصراحه انا كمان

لان فى ناس بتعلق عندى و فعلا بحتاج منهم الرجوع عشان اعرف وجهه

نظرهم لكن لا حياه لمن تنادى و بسبب كدا انا بقطع متابعه مدونتهم بالفعل

عشان مايجيش يقول رأى ويمشى بدون حتى مايفهم صاحب المدونه

تسلط أصحاب المدونه النقطه دى بجد فى الجوووون

فى بعض الاشخاص فعلا بشوفهم بيكتبوا عشان الناس تقول امين على

كلامهم ومش من حق حد يعترض على كلامه لانه حر فى مدونته و اللى مش

عجبه الكلام مايجيش من الاصل ماهو يااما تكون مؤيد يااما تخرج بلا عوده

و انتشر فى الفتره الاخيره ظاهره الحرب التدوينى كل واحد بيحارب التانى من

خلال المدونه بتاعته و بجد شفتها كتير عند بعض الاشخاص و تلاقى السبب

انه دخل مره علق عند صاحب المدونه و انتقده

ودا اعتقد انه راجع من فهم التدوين غلط و اننا ماعندناش ثقافه الرأى و الرأى

الاخر

بس انا لحظت ان الموضوع دا مقتصر على فئه معينه و هما صغار المدونين رغم

انه مش مبرر لان فى ناس سنها صغير و فكرها جميل و فعلا تحب تدخل معهم

فى نقاش و تحس انك بتحاور ناس كبيره و عقلها كبير

المواضيع التافهه

بص انا اختلف معك الصراحه فى النقطه دى ليه؟؟

لان المدونه عباره عن فضفضه لصاحبها يعنى ممكن انت شايف الموضوع تافهه

لكن هو من وجهه نظر صاحبه انه ذكره من ذكرياته يعنى مثلا دفتر ذكريات

بيكتب فيها عن اللى ضيقته عن فرحه عن اى حاجه حتى لو يومياته

مش لازم نحدد ان المدونه عباره عن ساحه للنقاش فقط

الهروب الكبير

صدقنى بيجى فتره على الواحد مابيقدرش يكمل فبتالى بيسيب كل حاجه
اصل وقتها هو مش هايقدر يفيد .. ولو كمل يبقى كدا هايتحاسب لانه

مابيقدمش حاجه لحد يبقى الاحسن انه يخرج من العالم دا و كفايه اللى قدمه

ليه

مدونات الشواذ

اووووووف عليها دى فعلا انتشرت بطريقه تخنق و فعلا الواحد لو علق عنده حد

كدا يحذف التعليق نهائى عشان حتى لينك المدونه مابيقاش موجود

بس انا اضيف ليهم المدونات الخارجه عن حدود الادب والاحترام دول بقى مش

شواذ لكن بيتكلموا فى حاجات تخدش الحياء فعلا

الناس دى بالفعل فاهمه الحريه غلط

و المفروض فعلا نعمل حمله توقفهم و تنصحهم و ترجعهم عن فكرهم الغلط دا

المدونين الهدامين

و مااكترهم فى عالم التدوين دول فاهمين النقد غلط من الاساس فاكرين انهم

لما بيظهروا الخراب فى البلد يبقى كدا هما ناس عارفه و واعيه بكل اللى

بيحصل

بس دول المفروض برضه نعلمهم ازاى النقد و اننا ننقد بحلول مش ننقد و نظهر

مصر بصورة بشعه وبس لان فى ناس بتقرا من جميع انحاء العالم و احنا فئه

بتمثل شعب مصر يبقى المفروض يكون فى فكر راقى و اسلوب متحضر واحنا

بنتكلم عشان الشباب الصغير مايجليوش احباط و يبقى عندهم دافع انهم

يدافعوا عن البلد مش نديهم دافع انهم يهجوا من البلد نهائى

مدونين الأنهزاميه

دول جامعين مابين التسلط و الهدم و للأسف ياريت اسلوبهم صح لكن اسلوبهم

بيبقى مستفز لدرجه ان الواحد مابيحبش يدخل معهم فى نقاش لانه بيحس

انه هايهين نفسه لو دخل

و لو قولت ليهم ياجماعه غلط ياجماعه البلد و تبدأ تتكلم معهم بالعقل يقولك هو

الواحد لما يسكت يبقى حلو و لما بيتكلم يبقى مابيحبش البلد

ياسيدى انتقد صح وباسلوب راقى بلاش اسلوب يظهر بلدنا بافظع صورة

يعنى معظم السلبيات اللى فى التدوين مقتصره على الجهل بالحوار و احترام

الرأى الاخر و فهم حريه الرأى غلط

عجبنى فكره وثيقه التدوين جدااا

اللى بيها الواحد يعرف يعنى ايه تدوين و يعنى ايه نقد و يعنى ايه لغه الحوار

اسفه على الاطاله

لكن فعلا الموضوع دا كان نفسى اتكلم فيه من زمان

و اشكرك انك طرحت و سمحت لينا اننا نتكلم فيه

EMMY BABY يقول...
أزال المؤلف هذا التعليق.
مـجـنـووون يقول...

يؤ يؤ هو فين التعليق ده

انتي حتنصبي والا ايه ههههههههههههههههههه


يلا بلاش عياط واكتبي من تاني هههههههههه

امضاء
مجنووون

EMMY BABY يقول...

اه والله كتبته ولسة بعمل ارسال تعليق جالى صفحة ان فى ERORR وبعدين صفحة ان النت فصل وضاع التعليق يا ولدى

على العموم نكتبه من تانى كله فدا هذا الموضوع الجميل

بجد والله موضوع بيشغل بالنا كلنا

بس ايه ياعم التفاؤل ده كل دى سلبيات قصاد الايجابيات اللى ممكن تتلخص فى الترابط ونسيت تقول كم المعلومات اللى بنكتسبها والخبرات والافكار ومعرفة الشخصيات بانواعها

نيجى بقى للسلبيات

- تـعـليـقـات الـمـجــامــلــة

الفكرة ان فى ناس بتجامل نتيجة النقطة رقم 3 فى السلبيات

بس انا من رايى ان المفروض الواحد يقول رايه فى حدود الاحترام ويبعد عن المجاملة بس مش معنى كدة انه يدخل يشتم


2- عـــدم متـابـعــه الـتـعـليـقـات

اه والله الموضوع ده بيضايقنى اوى اقعد نص ساعة ارد على تعليق حد علشان او ضح وجهة النظر وفى الاخر محدش يهتم

بس مع العلم انى انا من الناس اللى بيتابع الرد على تعليقاتى قراية بس وبرد فى حالة لو وجهلى سؤال عندى ليه اجابة


3- تســلط أصـحـــاب الـمـدونــات


المفروض اننا بنكتب علشان حد ينقضنا وينصحنا وبالتالى نطور من اسلوبنا مش علشان حد يجاملنا

بس بقى لو حد دخل يشتم ميستاهلشى غير التسلط بصراحة



4- التـعليقات الـبــارده


أه والله مينفعش يتقال عليها غير كده تلاقي واحد كاتب موضوع قيم وطويل وفيه حاجات جميله وأفكار حلوه , وتلاقي واحد غلس كاتب رد بارد وملهوش أي لازمه ولا اي فايدة للموضوع إلي بيرد عليه ، ومحدش بيستفاد منه خالص يعني من الأخر يوفر وقته ونظره وصحته ويروح يصلي له ركعتين أحسن

ههههههههههههههههههه ضحكتنى اوى والله وخاصة اخر جملة



5- الـمـدونـيـن الـمصلحـجـية

اه والله سبحان الله وفى بنات كدة برضه مع ان رأى النوعين مهم لان مع اختلاف الطبيعة بينتج اختلاف فى الاراء وده انا استشفيته جدا فى اخر بوست ليا لما لاقيت معظم البنات مؤيدين والرجالة هما اللى معترضين !!!!!!!!!


6- المـوضــوعــات الـتـافـهــة


انت ممكن ترد تقله مثلا انا من رايى لو كتبت الموضوع من الناحية دى هيكون اكثر قيمة

لانه ممكن فعلا يكون محتاج النصيحة


7- الــهـــروب الـكـبـيـر


انا شايفة ان كل واحد فينا بيجيلة لحظات ضعف وزهق مش عيب انه ياخد هدنة لكن يسيب التدوين خالص هو ده الهروب

ومتنساش ان السلبية دى هى اللى بتظهر الايجابيات اللى عرضتها


8- مــدونــات الشــواذ والـمـثـلـيـيـن
انا بصراحة مش فاهمة يعنى ايه مثليين

بس بجد والله انا فعلا اول مادخلت التدوين وصادفت مدونة كدة والله جاتلى صدمة ومكنتش مصدقة معقولة فى كدة بس عرفت ان زى مافى كدة فى ناس ربنا يكرمهم

وانا موافقة جدا على اقتراحك وانا نوعا ما بطبقه بس بصراحة مبديش نصيحة علشان منزلشى للمستوى ده


9- الــمـدونـيـن الـهــدامـيـن
الناس اللي شغاله هجوم علي البلد وعلي إلي فيها ودي أهم حاجه في الموضوع دا كله ، يا جماعه هي البلد دي مفهاش غير الخراب والدمار والسرقة والنصب ، انتوا كده بتزرعوا روح الأنهزاميه بين الشباب وروح كره البلد وبتشجعوهم علي الخراب ، يا عالم يا هووووو إرحمونا مش كفايه اللي ماسكينها خربوها أحنا كمان هنخربها

اؤيدك تماما رايى تيبكال رايك



10- مــدونـيـن الأنـهـزامـيـة

للاسف ساعات كتير بيحطموا امال حلوة جوة حد فينا من غير مايشعروا

بجد احييك بشدة على الموضوع ده

معلش بقى طولت عليك واتاخرت كمان

تحيااااااااااااتى

ايمى

أختكم فى الله يقول...

موضوع رائع جداااااااااااااا


جزاك الله خيرا على اثارته

سمكه واحده يقول...

امممم انا خايفه اشكر يتقال عليا ولا اعيذو بالله من الكلام البطال ده
بس بجد والله موضوعك حلو ومهم وعندك حق ومش بعلق وخلاص والله عاااااا
كمان ده انت ابن بلدي اديني بشهر نفسي اهو عشان ايميلات بقي وكده هههههه
بس كلامك صح والله يا مجنون وفعلا انا دخلت عالم التدوين ده وانا مش فاهمه في البطيخ بس والله بحاول استفيد واغير من نفسي وبجد بسوطه وعايزاه يستمر ويرتقي وفعلا مش شهره ولا هبل وخلاص

كمان الرداله اللي بيعلقوا عند البنات دي متقطعش حبل الوداد ههههه
ربنا يكرمك بجد وكلامك صح واسلوبك صح ومش بجامل ولا بهبل عااااا والله وانا بكتبلك خايفه اكون منهم ولا حاجه
واكتر حاجه عجباني فيه الروح الحلوه حسيت ان الناس بتحب بعض بجد ولسه في ناس ليها فكر وراقيه وبتفهم مصر لسه بخير يا عبله
تحياتي وتقبل مروري ومتجيش المدونه بتعتي ال اكون بكلم كلمتين لا تيجي ولا حاجه
لا بجد والله عارف المدونه دي ايه اي حاجه الواحد بيبقي لقيها حلوه بينشرها فيها او حسب المود بتاعه يكتب اي حاجه مهمه مش مهمه صغيره كبيره بجد بتعبر عن الشخص
تحياتي وتقبل مروري انا هعدي بسرعه والله منتا قايم مش هعطلك
سمكه
سمكه

romansy يقول...

مش بيقولوا خدوا الحكمه من افواه المجانين
انت بجد مجنووووووووووووون
تصدق مع انى بقالى فتره صغيره فى عالم التدوين الا انى ابتديت احس باللى انت بتقوله دا كله
فيه ناس كتير بتجامل
وناس بتعلق وخلاص
وناس بتوع المصلحه بس
بس فعلا والله يا مجنون
انا ندمت انى مش بدون من زماااااااااان
فعلا والله انا حبيبت العالم دا قوى
كل يوم بتستفاد جديد
وكمان بتكسب اصدقاء جداد
وفكر جديد بيوصلك
ويلا بقى نفسنا نحط ايدينا فى ايد بعض
ونبقى احسن مدونين فى مصر

mohamed ghalia يقول...

متفق معاك تماما فى الإيجابيات والسلبيات
وعندك حق فى إنى مدونات قايمة على أفكار هدامة لازم نتجنبها
وفعلا الحاجة إ‘لى بتحرق دم الواحد إنى واحد بعد معرفة مدونتة يتوقف عن التدوين وميعملش للناس إلى حبته إعتبار
بصراحة إنت لميت الموضوع من جميع النواحى
ربنا يكرمك
يارب بس متعتبرش ردى من الرود المملة ههههههههههههه
تحياتى

هانى زينهم يقول...

ربنا يكرمك اهو ده اللى كان نفسى اقوله من زمان وكسلت اكتبه لانى مقتنع ان التغيير هيكون بنسبة معدومة لان كل واحد له دماغه بس بجد ربنا يكرمك تانى وفعلا السلبيات اللى انت رصدتها دى خلتنى كذا مرة افكر اقفل المدونة بس رجعت اقول الواحد عرف ناس حرام يخسرها .

نيرة و منةالله يقول...

ممممممممممممم
شكرا بج انك وضحت الحجات دى
لانى لسة فى البداية او لسة مبداتش اصلا
والحاجات دى ساعدتنى ونبهتنى بصراحة
لك جزيل الشكر
نيرة

أمل حمدي يقول...

ازيك يا مجنون زعلان ليه

اقولك الحقيقة كل كلامك كلنا عايزين نقوله وحاسين بيه
انت عارف انا كنت فاكرة ان كل المدونين اصحاب فكر واصحاب قلم ادباء شعراء
لكن لقيت حاجات غير كدا خالص
اتصدمت والله
وياريت نعمل حملة ونشارك فيها
موضوع مهم جدا
بارك الله فيك يا اعقل مجنون

princess يقول...

انا قرات التعليقات كمان ههههه الناس كلها عمالة تقولك اوعى اكون انا منهم هههههههه عملتهم رعب
المهم انا بس فى نقطة صغيرة اللى عايزة توضيح فيهاهيا مش قيمة اللى بيكتب تختلف من شخص للتانى
يعنى مثلا ممكن حد يجى يقرا عندى حاجة زى مثلا اليوميات ويقول ايه الهبل ده دى بنت هايفة اوى
وحد تانى يبصلها على انها يوميات وحاجة خفيفة وكمان بتقرب الناس من بعض لانك بتحكى مواقف حصلتلك والناس تعلق وتديك رايك
بلاش يوميات
مثال تانى افرض مثلا حد كتب قصة او شعر ممكن انا اشوفها حلوة وانت مثلا لا تشوفها مش حلوة
انا قصدى ان ممكن الناس مش بتجامل هيا مثلا شايفة ان البوست حلو
يارب اكون قدرت اوصل وجهة نظرى
ثانيا بالنسبة لحكاية ان محدش بيتابع التعليقات لو كان سال او استفسر معلش دى ساعات بتبقى حاجات خارجة عن ارادة الواحد يعنى ممكن ننسى مثلا:)
اخر حاجة بالنسبة للمدونات الخارجة انا مرة بالصدفة كنت بتصفح المدونات ودخلت على مدونة منهم والله مكنتش اعرف غير لما دخلت بالفعل
عينى بس وقعت على عنوان
مش قادرة ولا ينفع اقوله
انا قفلت بسرعة وبصراحة عيطت
حسيت بقرف شديد لدرجة انى حسيت ان عينى وجعتنى عشان جت على العنوان ده
ربنا يهدى الجميع
وهتابع الرد ههههههههه يارب افتكر(وش بيطلع لسانه)

طوبه فضه وطوبه دهب يقول...

الموضوع بجد جميل وكلنا كنا محتاجين نرتب افكارنا وننظم السلبيات والايجابيات وبجد كل الايجابيات الحمد لله موجوده اما السلبيات عدم متابعه التعليقات دى احيانا بتكون غصب عنك انك دخلت زرت المدونه وقريت الموضوع ورديت لكن بعدها ما كانش فى وقت او نسيت من كتر الموضوعات اللى رديت فيها وخاصه انى بدخل يومين فى الاسبوع اعلق عند كل الموضوعات الجديده فغصب عنى بنسى علقت فين
اما موضوع مدونات الشواذ فانا فعلا مشوارى التدوينى قصير وتصفحى بس فى المدونات اللى عرفاها غالبا الا انى بعتبرها امانه ان كل اللى يعرف مدونه منهم وما ينبهش الباقى فهو هيتحاسب على كده لان مش كل الناس بتكون عرفه كل حاجه عن المدونه
اما الهروب الكبير فانا مش من انصار انى اعتذر او انزل موضوع انى مش هكتب لكن دا ما يمنعش ان الانسان احيانا بيصل لحاله لا يحتاج فيها الا الجلوس مع نفسه واعاده كل حساباته بمفرده
وايضا الموضوعات التافهه احيانا يشعر الانسان انه فى حاجه الى ان يكتب ما بداخله حتى ولو رئاه من حوله تافه فهو مجرد تعبير عن نفسه لذلك فليكتب كل شخص ما يريد طالما انه لم يؤذى احد او يتعدى على احد ولنختار نحن القراء نوعيه الموضوعات التى نعلق فيها والتى لا تستحق يمكن ان نتركها دون جرح صاحب الموضوع اسفه على التاخير والتطويل واتفق معك فى باقى السلبيات

blue-wave يقول...

والله العظيم تسلم دماغك يا مجنون
انت بالظبط لخصت كل مساوئ التدوين ومزاياة
وخصوصا تعليقات المجامله والمصلحجيه او المظباطيه ( معلش تعبير عبيط بس جه على بالى)
بس معلش انا ليا ملحوظه واحدة على الموضوعات الهايفه
جايز هيا هايفه بالنسبالك بس هيا مهمه عند اللى كتبها قياسا بسنه وخبرته
يبقى برضه نشجعه ونحفزة مش نقوله ايه الهيافه اللى انت كاتبها دى
مش كدا ولا ايه؟
لكن غى العموم بوست هايل وبجد جمعت فيه كلام كتير جوة كل حد فينا
تحياتى

ساسو يقول...

وانا بقرأ الكلام ده
حسيت اني من الناس اللي انت بتتكلم عنهم وكان نفسي حد من زمان يقول الكلام ده
وكنت عايزه اقول حاجه بخصوص الموضوعات التافهه
ممكن انا اشوف ان الموضوع ده تافهه وملوش لزمه لكن بالنسبه لصحبه بيكون حاجه تانيه خالص
ممكن يكون الموضوع ده عباره عن كلمتين مكتبين ميمثلوش لحضرتنا حاجه ومنعرفش قصتهم ايه لكن بتكون بالنسبه ليه هم وشيله جواه وعايز يخلص منه ومش لاقي اللي يسمعه وهو مابيجبرش حد انه يرد عليه او يقرأها حتي .
ياريت يكون وصلك قصدي
وبجد كلامك المره دي مهم فعلا ولازم نعرف تعليقات اكبر كم من المدونين عليه
وانا ان شاء الله هتابع الموضوع يمكن استفيد من الباقين ومن رأيك طبعا..

مهرة سالم يقول...

اولا بدأت أشك بأنك مجنون...
يا أنت مجنون وأنا كمان ...
يا أنت عاقل وأنا كمان...
فشوف نحن الاتنين نبقى ايه بالظبط...
..............
اتفق معك في كل الي قلته...
واضيف ان هناك مدونين عرب ملحدين...
للأسف يسبون الدين الاسلامي بشكل خاص..
وينشرون أفكارهم الهدامه ...
ويضايقني جدا تلفظ بعض المدونيين
بألفاظ غير مقبوله هي ليست جارحه ولاكن غير مقبوله....
موضوعك فعلا يجب نقاشه في تجمع يضم المدونيين لتبادل وجهات النظر...
فالتعليقات لا أظن انها تكفي ...
.........
شكرا لموضوعك الذي يحث على التفاعل...
...........
دمت بخير...

مـجـنـووون يقول...

محاسن صابر

سيدتي الفاضله كم يسعدني تشريفك لمدونتي المتواضعه

وبجد ببقي فرحان بتعليقك عندي

****************

عندك حق في موضوع مدونات الشواذ ،
لأن أحنا عيشين في مجتمع مسلم وبتحكمنا العادات والتقاليد
والناس دي ندعلها أن ربنا يهديا ويرحمهم من إلي هم فيه ، وكان عجبني ردك علي احد المثلين في موضوع سابق لكي

الله يخليكي يار ب علي كلامك الرقيق ده

اسعدي حضورك
مجنووون

مـجـنـووون يقول...

انغام علام

اسعدني حضورك لأول مرة

أن شاء الله متكنيش من الناس دي وحتي لو كنتي منهم وعرفتي الصح يبقي لازم تتغيري للأحسن

اسعدني حضورك
مجنووون

مـجـنـووون يقول...

ضد التيار

اسعدني حضورك سيدتي الفاضله
عندك حق الناس دي بتعلق علشان تنشر مدونتها وخلاص ، يعني دعايه وإعلان

أصعب مشكله بتواجه الزوار هي موضوع عدم التواصل في التعليقات ، لأن دي هي الفايدة الفعلية للتعليق

عندك حق في حكاية المواضيع التافهه ، بس هل معني ذلك أن أحنا نشجعه علي التفاهه بتعته


بالنسبه للهروب الكبير : أحنا دلوقتي شيلين هم البلد دي وبنحاول نعالجها بالي بنعمله ده .وطبعا مهمتنا عظيمه وأهدفها نبيلة وإلي يتخلي عنها يبقي كأنه بيهرب بالظبط

معلومة كويسه قوي فعلا لأزم نضيف ليهم الناس الي بتعمل مدونات خارجه عن حدود الأدب والأخلاق

ال اسفه علي الأطاله ال دانا عيوني اتحولت من التركيز والقرايه لتعليقك الشيق جداً ههههههههههههههههههههه

اسعدني حضورك سيدتي
مجنووون

مـجـنـووون يقول...

ايمي

انتي ديما منوره مدونتي
معلش التعليق راح بس كلماتك لسه موجودة وقلمك لسه الحبر فيه ولو خلص حبر اجبلك قلم علي حسابك هههههههههههههههههه

اضافه جديدة للموضوع . كم المعلومات اللى بنكتسبها والخبرات والافكار ومعرفة الشخصيات بانواعها
أن مش قصدي أنه يجامل أنه يدخل ويغلط علي الناس ولكن ف يحاجه اسمها النقد البناء الي يخلي الناس تستفيد منه

طبعا لما حد يشتم مش نغلط فيه أحنا أكبر من كده ومننزلش لمستواه الواطي
ولو غلطنا فيه يبقي بنعمل له قيمة ولأزمه بين الناس
هههههههههههههههههه لو حصل كده ناس كتيه حتوب إلي ربنا وحناخد حسنات كتيره قوي

عندك حق في موضوع التعليقات التافهة والحل معاهم أن احات نوجهن للصح

مثليين يعني راجل وراجل وست وست يبقي كام ؟؟هههههههههههههههه

ديما منوراني أيمي
مجنووون

مـجـنـووون يقول...

سمكة وحده
يسعدني تشريفك يا غاليه

لالالا اشكري براحتك وخدي راحتك علي الأخر مش حزعل ولا حخلي حد يقول عليكي حاجه ههههههههههههههههههههه

الله يخليكي يا رب علي كلماتك الجميله
اسعدني حضورك سمكة وحده لا تكفي هههههههههههه

مجنووون

مـجـنـووون يقول...

رومانسي

بجد ببقي فرحان لما بلقيك متابع مواضيع ومشرفني ديما
خليكا معانا وانت حتبقي ديما مبسوط وربنا يوفقك يا رب
ايدك في ايدنا نغير عالم التدوين

اسعدني حضورك سيدي الفاضل
مجنووون

مـجـنـووون يقول...

mohamed ghalia

اسعدني حضورك استاذي العزيز
فعلا أصعب حاجه أنك تلاقي وأحد كان معاك وقريب منك وفجأة وحده يهرب ويتخلي عنك

اسعدني حضورك سيدي الفاضل
مجنووون

مـجـنـووون يقول...

هاني زينهم

استاذي العزيز ومعلمي الفاضل
يسعدني تشريفك الدائم لمدونتي
أحنا بنتعلم منك

لو الحل في قفل المدونة كانت الناس كلها قفلت وهربت ولكن دي بتكبر المشكله وبتعطي أنطباع قدام الناس أن عالم التدوين عالم هش

اسعدني حضورك
مجنووون

مـجـنـووون يقول...

نيرة ومنة الله

منورة نيرة ومنة الله مدونتي المتواضعه

خدوا بلكم من الحاجات دي وأنتوا حتبقي من أحلي المدونين
جزاني وأياكم

اسعدني حضوركما
مجنووون

مـجـنـووون يقول...

ماما أمولة

اسعدني حضورك أمي الفاضله
أنا عارف انكم عايزين تقولوه وانا بحسب بيكم وقولت اريحكم واكتبه انا
لا طبعا في كل مكان في الدنيا فيه الكويس والوحش
أحنا أن شاء الله حنعمل وثيقة ونكتب اسم الناس الي شاركطت في الموضوع ده فيها وكل وأحد حيشارك في الموضوع ده ويوافق عليه نكتب اسمه ونعمل رابطه اسمها نحو تدوين أفضل

اسعدني حضورك أمي الغاليه
مجنووون

مـجـنـووون يقول...

princess

منورة المدونة يا غاليه
طبعا انتي أول ما قريتي الكلام ده اترعبتي هههههههههههههه
أنا متفق معاكي في موضوع الموضوعات التافهة
بالنسبه لموضوع الشعر والقصة لو مش بتفهم في الشعر او القصة قول رائيك في الموضوع العام مش لازم تتكلم عن المعاني والألفاظ والكناية والبلاغه
فهمتيني ؟؟؟
سيدتي الفاضله بالنسبه لموضوع تجاهل التعلقات مفيش حاجه تمنع متابعة التعليق علشان دي اساس الموضوعات المطروحه والتي يتم فيها النقاش
ربنا يعفينا من المدونات الشاذه

اسعدني حضورك
مجنووون

مـجـنـووون يقول...

طوبة فضة وطوبة ذهب

اسعدني حضورك سيدتي الفاضله

عندك حق لأزم نحظر الناس من المدونات الخارجه والهدامه علشان الناس تاخد بالها منها
ونعمل ليه مسوده سوداء بأسامي هذه المدونات

عندك حق في حكاية الموضوعات التافهة

اسعدني حضورك
مجنووون

مـجـنـووون يقول...

blue-wave

دي شهاده أعتز بيها منك يا استاذي العزيز

هههههههههههههههههههه حلو مصطلح المظباطيه ومعبر جداً

عندك حق في حكاية الموضوعات الهايفه

يا ريت تبقي معانا الأيام إلي جايه علشان نعمل وثيقة للمدونين
ونعمل قائمة بالمدونات الي يوجد فيها مواصفات الي حنتفق عليها

اسعدني حضورك استاذي العزيز
مجنووون

مـجـنـووون يقول...

ساسو

اسعدني حضورك سيدتي الفاضله

ولا يهمك المهم يبقي في تغير

الموضوعات التافهة حنشلها من الوثيقة غلي حنعملها

وصل كلامك وجاري التنفيذ

يا ريت تتبعينا علشان نغير العالم ده للأحسن

اسعدني حضورك سيدتي الفاضله
مجنووون

مـجـنـووون يقول...

m.k

اسعدني حضورك سيدتي الفاضله

أنا مجنون بس يا تري أنتي مجنونه ؟؟؟


عندك حق في حكاية المدونين الملحدين وبيتطاول علي الإسلام ولازم نقف ليهم ونحذر الناس منهم ومن فكرهم الهدام


وبالنسبه لموضوع الألفاظ الجارحه نبقي نضع ليها شروط علشان نعرفها كويس ونحالو نعلجها


أن شاء الله أحاول أشوف روم ويتجمع فيه كل المدونين الي حيشتركوا معايا في الحملة دي علشان نحط وثيقة نتفق عليها ويبقي الناس كلها عرفاها

اسعدني حضورك سيدتي الفاضله
مجنووون

mostafa rayan يقول...

بص انا متفق معاك في حاجات وحاجات لاء
مثل عدم متابعة التعليقات مش شرط اني علشان كتبت تعليق اروح اشوف رد صاحب المدونة عليا في مدونين كتير مابيردوش على التعليقات بقيولكدوري انتهي عند كتابة البوست وانت حر في رأيك
- كمان المواضيع الهايفة كل واحد شابف ان موضوعه مهم ممكن تكون انت شايفه هايف وغيرك شايف فل الفل كل واحد حر وبعدين في الأول والأخر المدونة دي حاجة شخصية اكتب فيها الل يعايزه بصرف النظر عن رأي الأخر فيه
- اما موضوع ترك التدوين انا شايف انه مش هروب ولا سلبية لكن حرية شخصية طلبت معايا ادون وطلبت معايا اسيب انا حر
- انا عايز اضيف شيء اخر لمساوئ التدوين لو سمحتلي .. انه بيسرق الوقت جامد فلو ماحفظناش على وقتنا جوة العالم دة هتلاقي نفسك في الأخر مابتعملش حادة غير انك قاعد قدام الكمبيوتر بتابع تدوينة او بتكتب تعليق او برتوح تشوف الرد على تعليق سيبته
في اشياء كتير قوي في الدنيا اهم من التدوين
تحياتي لك

مـجـنـووون يقول...

mostafa rayan

كم يسعدني حضورك سيدي الكريم

بالنسبه لموضوع عدم الرد علي التعلقات

لما تبقي عامل موضوع للنقاش يبقي لأزم يبقي في حوار بين الطرفين علشان يوصلوا في الأخر لصيغة تفاهم مشتركة ، وعلشان لو كان في سوء تفاهم بينهم بالحوار والناقشة ينزال

وبعدين ايه فايدة المدونات لو مكنش فيها تواصل وفكر

أنا رائي إلي مش عايز يرد علي تعليقات حد ، يقفل التعلقات أحسن علشان يرح نفهس ويرح الناس

انت حر طبعا في الي بتعمله بس مش حر انك تحرم الناس من تجاربك وخبارتك وتحرم ناس ارتبطت بيك وبتتواصل معاك

عندك حق موضوع سرقة الوقت وكثرة الجلوس أمام المدونة ، وأن شاء الله نضفها في الوثيقة إلي حنعملها سوي

أسعدني حضورك
مجنووون

غرباء يقول...

والله دا موضوع جمييييييييي

وطب بعدين هنعمل ايه دلوقت
الساعة كام
طيب عايز ايييه
انا ماشي
بس مش عارف أنا رايح فين
أنانسيت ولا ايه
افتكرت
انا رايح فين
يووه انا نسيت تاني
خلاص افتكرت
أنا رايح لمدونة غرباء
ايه هتيجي ولا ايه
طيب مستنيك
مع تحياتي
عضو بارز في جمعية مرضي الزهايمر

Unknown يقول...

على فكرة انت مش مجنون ولا حاجه

وانا من زمان متابع مدونات كتيرة اوى

وكل اللى قلته صح ولا يقبل النقاش

ازاى مدون معين يحس فعلا انه كويس او مش كويس مع كمية المجاملات اللى بشوفها ما كده هيستمر فى الاسلوب الغلط ومفيش اى نقد بجد بيفيد الا فين وفين

حبيبى المجنون انا كنت ناوى انى اتكلم فى مضووع زى ده وخصوصا انى كنت ناوى انزل لينك عن الموضوع ده

ربنا يوفقك بجد واذا فيه اى حاجه ياريت نحكى

ليك منى كل الاحترام يا بطل

من بعيد .. بكتبلك

princess يقول...

مجنون
انا جيت تانى ههههههه
كده انا اترعبت(وش متغاظ)
طب لو جيت عندى هروش ماية هههههههه
مممممممم ماشى:)

princess يقول...

اه صحيح انا ما علقتش على التعليق اللى علقته على تعليقى
عشان متفقة معاك فى التعليق بس نسيت لما كتبت التعليق على تعليقك
فقلت اكتب تعليق تانى ههههههه

منى يقول...

ان كنت بتعتبر البوست ده وثيقه فانا ابصم عليه بالعشره
الله ينور عليك
ودى مش مجامله والله

لو كل واحد يعرف الكلمه اللى بيكتبها دى بتاثر ازاى وفى ناس اد ايه وانه هيتحاسب عليها
كان فكر الف مره
تحياتى وتقديرى

Sweet Violet يقول...

كلاكيت مره اخرى

المواضيع التافهه من الاساس انا معترضه عليها

يعنى وجهه نظرك انها تافهه ممكن تكون بالنسبه لصاحبها مش تافهه ولا حاجه

انا ماقولتش طبعا لما يكون فى اجماع ان الموضوع تافه نشجعه بس برضه لازم نعرف وجهه نظره فى نزول البوست .. ولا ايه؟؟؟

------------
ال اسفه علي الأطاله ال دانا عيوني اتحولت من التركيز والقرايه لتعليقك الشيق جداً

ههههههههههههههههههههههه تصدق باايه انت اول لما نشرت التعليق و انا شفته رغم انه بعد فتره من الكتابه الا ان ايدى وجعتنى ههههههههههههههههههه

اصل انا مختلفه كل حاجه عندى بأثر رجعى D:

كـــيــــــــارا يقول...

التدوين ده عالم جميل وظريف وعلشان يفضل عالم جميل لأزم يبقي في حاجات تحكمه ،

---------

ده طبعا ولازمن ولابود يكون في اطار ماشيين عليه

-------
سيبنا من الايجابيات لانه لا خلاف عليها
----------

ثانيا : حاجات بتخنقني وبتخليني أزهق وببقي بقول في نفسي لو شفت واحد مدون حديله بوكس أخليه يفكر مليون مرة قبل ما يفكر يعمل الحاجات دي

-----------

عاااااااااااااااااااااا تدي مين بوكس بقي عاااااااااااااااااااااااااااااا

---------------------



1- تـعـليـقـات الـمـجــامــلــة

-------------------------

عارف انها بتخنقني جدا لاني لو بنزل بوست ببقي منتظره التعليق يكون عن البوست مش مجرد اثبات حضور وخلاص وعشان يبقي عدد الكومنتات كتير بالعكس بيبقي جميل اوي انك تلاقي بوست كل الكومنتات اللي فيه مناقشه ن البوست مش مجرد جميل وحلو وتحياتي وسووووك علي بناتك بعد كده

----------

2- عـــدم متـابـعــه الـتـعـليـقـات

دي بقي حلها انا لقيته ان اعمل تعقيب بحيث كل بوست انا رديت فيه بقت تيجيلي الكومنتات علي الميل ولو الموضوع حسه انه محتاج رجوعي برجع وده بيبقي مفيد جدا

-------------


3- تســلط أصـحـــاب الـمـدونــات

ده بقي ابصم بالمليووووووووووووووون انه موجود ولو عاوز احط لينكات لمدونات فيها كدا هحط

حاجه تخنق بجد ناس مش بتعترف بوجود حاجه اسمها " الراي الاخــــــــــــر"

--------------

4- التـعليقات الـبــارده

ههههههههههههههههههه ده فعلا وكمان اللي بيعملوا تعليقات اعلان لمدونتاهم بيحسسني باعلان اريال وامو

هههههههههههههههه عشان الناس تشتري المساله مش مساله عدد كومنتات

واحيانا اللي بيردو ويقولوا شمال والموضوع اصلا جنوب

يالهوووووووووووووووووووي الواحد بيتنقط فعلا

--------------
5- الـمـدونـيـن الـمصلحـجـية

ممممممممممممممممم فعلا موجود ده
----------------

6- المـوضــوعــات الـتـافـهــة

دي مش معك فيها كل موضوع واحد بينزله بيكون مهم بالنسبه له ولو كان عارف انه تافه مكنش هينزله المهم اننا واحنا بنرد عليه نقول كلمه حق سوا بالنقد الايجابي او مدح الموضوع المهم يكون الراي اللي بيتكتب نكون حسينه
---------------

7- الــهـــروب الـكـبـيـر

انت بتقول ده وانت في كامل قواك العقليه والنفسيه لكن لما بتوصل لقمه الضيق بتقول انا امشي

وانت كنت هتغيب بس لما رجعت لحالتك المجانينيه تاني رجعت

----------------

8- مــدونــات الشــواذ والـمـثـلـيـيـن
دي بقي حاجه تششششششششششششل انا كنت هنزل بوست مخصوص عنهم بس احرجت جدا ومنزلتش البوست

فعلا مش عارفه اقول ايه ده غير كمان اللي هما مش مثليين بس مدوناتهم اقل مايقال انها حقيره

لانها لا بتراعي حياء ولا ادب ولا دين ولا شي

---------------


9- الــمـدونـيـن الـهــدامـيـن
الناس اللي شغاله هجوم علي البلد وعلي إلي فيها ودي أهم حاجه في الموضوع دا كله ، يا جماعه هي البلد دي مفهاش غير الخراب والدمار والسرقة والنصب ، انتوا كده بتزرعوا روح الأنهزاميه بين الشباب وروح كره البلد وبتشجعوهم علي الخراب ، يا عالم يا هووووو إرحمونا مش كفايه اللي ماسكينها خربوها أحنا كمان هنخربها


-----------

اتفق معك في النقطه دي واللي بعدها....

وجميله اوي فكره الوثيقه انا جيت وعارفه اني تاخرت

بس انا حاجزه التعليق الاول

سلاموز:)

رؤية يقول...

مجنون بس عاقل...
هى الفكرة كويسة
بس فى بعض نواحيها بتحمل وجهة نظر شخصية ... بعنى...
انه قد يوجد مايمثل عيب بالنسبة لك يكون ميزة لغيرك والعكس...
لكن عموما التدوين يصعب تقنينه وان كان لا يصعب تحميله بالاخلاقيات

سعدت بالمرور بمدونتك ..
تحياتى لك

ahmed_k يقول...

في البدايه عايز أحييك يا مازن على موضوعك المهم ده
واتفق معك تماما في الإيجابيات واللي أتمنى أن تزداد وتدوم بيننا وان تكون علامه مميزه لكل من ينتمي لهذا العالم
وبالنسبه للسلبيات فأنت ذكرت منها الكثير وأتفق معك فيها ولكن
قد يكون منا من تأخذه مشاغله لوقت معين لا يستطيع خلاله متابعة كل المدونات الصديقه له والتعليق عليها
فهؤلاء نعذرهم
وفي ناس ليس لديها من الوقت المتسع لتقرأ البوستات الكبيره فبيردوا بشكل مجامل ولهم ظروفهم
طبعا انا ضد هذا الفعل لأن المدون قد يكون كاتب داخل المقال أمور لا يقبلها أحد
فبتعليقنا تعليق مجامل عليها نعطيه دفعه للإستمرار في فكره
وأتفق معك تماما بخصوص مدونات الشاذين والملحدين وأضيف العلمانيين
ولكني لاأحذف تعليقاتهم بل أخبرهم في ردي أنهم غير مرحب بهم وذلك للأسباب التاليه وأذكر اسبابي حتي يعرف حقيقتهم المتطلع ومتابع المدونه ويأخذ حذره منه ومن أمثاله
وفي الختام أرجو من الله أن ينفض عن بلادنا كل همومها وأن يكون منتقد ما يحدث فيها من دافع حبه لها وليس من دافع الإنتقاد لحب النقد وفقط
فمصر مليانه بالخير والحب فياريت زي ما بنظهر سلبياتها نظهر جمالها وحسنها
فكل بلد فيها الحلو والوحش وكذلك مصر

وتقبل يا صديقي مني كل التحايا

راعى الناقه يقول...

لا بصراحه النهاردا انت طلعت الجنون فعلا على بعض المدونين وللاسف جنونك دا عين العقل
فعلا كلامك فى السليم
واضيف الروح النهزاميه عند بعض المدونين
واضيف
نشر العادات السيئه من استماع للغناء وشغف بعادات الكفار وانديتهم وغيره

hager يقول...

الموضوع رااائع جداا والله
وان شاء الله لو في وقت هبقي اجي تاني اعلق علي كذا نقطه
تقبل مروري

DINA ABBAS يقول...

انا معاك طبعا فى كل اللى انت قولته يامجنون

وياريت فعلا كلنا نلتزم بالكلام ده لانه اكيد هيفرق معانا كتير

لك منى كل التحيه

مـجـنـووون يقول...

ضد التيار

أنا متفق معاكي في كلامك وأكيد لأزم يبقي في نقض بناء علشان نفيد الناس بخبرتنا وأرائنا

ألف سلامه عليكي أنشالله إلي كاتب البوست هههههههههههههه

اسعدني حضورك
مجنووون

مـجـنـووون يقول...

كيارا

ياااااه أخيرا عبرتيني ورديتي علي البوست
إلي مش مصدق أني أديله بوكس خليني بس أشوفه وأنا حوريه حعمل ايه ههههههههههههه

احنا عيزين نطلع من تعليقات المجاملة وقصدي بكده مثلا الناس الي بتفهم في الشعر تقول رائيها في الشعر من حيث البلاغة والألفاظ والناس الي بتفهم في السياسة تقولي رائيها السياسي . مش كله يكتب حلو وجميل وخلاص

عندك حق في حكاية الموضوعات التافهة بس المفروض تقولي رائيك بصراحه ومن غير مجاملة

أسعدني حضورك
مجنووون

مـجـنـووون يقول...

رؤية
كم يسعدني حضورك سيدتي الفاضله
أنا بس حوضحلك حاجه أحنا إلي يحكمنا شريعة أسلاميه وعادات وتقاليد وكل حاجه متختلفش مع الشريعة أو العادات والتقاليد يبقي أكيد مش حيكون فيها أختلاف

أنا عارف أن يصعب تقنينه ولكن أحنا بنعمل إلي علينا علشان نبراء ذمتنا من الي بيحصل ده يوم القيامة علاشن أحنا بقينا في وسط ناس ومدام شيفين الغلط يبقي لازم نتكلم

اسعدني حضورك
مجنووون

مـجـنـووون يقول...

ahmed_k

كم يسعدني تعليقك استاذي الكريم
والله يا غالي لو صحيح الناس دي بتحبها يبقي استحالة حتبعد حتي لو حصلك ظروف يبقي تضر عليهم كل فترة

فكرة كويسه موضوع انك متحذفش التعليق وترد عليه ، بس أنا بعتقد أن الأفضل أنك لماتلاقي تعليقات فيها الفاظ جاحه تقوم بحذفها علشان متاذيش الي بيقراها

يا ريت يكون في ناس زيك كده بتحب بلدها وخايفه عليها

اسعدني حضورك استاذي الكريم
مجنووون

مـجـنـووون يقول...

راعي الناقة

كم يسعدني تشريفك لمدونتي المتواضعه
فكرة جديدة وحنضيف ليها نشر العادات السيئة

اسعدني حضورك سيدي الفاضل
مجنووون

مـجـنـووون يقول...

heger

اسعدني حضورك هاجر
وبعدين كنتي غايبه فين
اابقي طمنينا عليكي

اسعدني حضورك
مجنووون

مـجـنـووون يقول...

عاشقة الستقرار

اسعدني حضورك سيدتي الفاضلة
أيدك في أيدينا الدنيا كلها حتتغير

شكراً لمرورك
مجنووون

مخنوق كيك يقول...

متفق معاك يا مجنون في كل حاجة قلتها

اللا سطر " الموضوعات التافهه "

انا مش متفق معاك في دي خالص . ومكنتش اتمني اني اقراها في مدونة لواحد مجنون

لان لو المقياس تحول في المدونات الي
" لا تكتب كذا وافعل كذا ستتحول الي تطرف فكري الي حد ما "

بمعني . الموضوع التافه هو الموضوع الذي لا يتناول اي شئ من نواحي الحياه اطلاقا .. وهذا ليس موجودا اصلا

ليس هناك ما يسمي بالموضوع التافه في الوقت الحالي . لاني لو كتبت موضوع فقط الغرض منه تعلم القراءه والكتابة. فهذا موضوع قيم .

كل واحد ليه وجهه نظره وممكن يكتب موضوع في منتهي التفاهه كما تقول . ولكن في الاصل الموضوع له مغزي اكبر من ذلك
فيلم الكيف هو فيلم ممكن نقول للحشاشين فقط .. لكن هو في الاصل للطبقة المثقفة

كما قالها المفكر في ثنائيات المعني والمغزي

واخيرا تقبل تحياتي

مخنوق كيك يقول...

علي فكرة انا مكنتش متوقع انك تحط سيطرة علي الردود تبيح ما تشاء وتسقط ما تشاء

انا منزعج جدا فعلا واري انه من نواقض كل كلامك بخصوص شرف التددوين وحريه الراي والتعبير

تقبل اسفي

مـجـنـووون يقول...

مخنوق كيك

أخي وأستاذي الغالي كم يسعدني تشريفك لمدونتي المتواضعه

بس أحب أذكر حضرتك أنك لو قريت التعليقات حتلاقي ان أحنا كنا بنتناقش علشان نضع وثيقة مناسبه وتشمل كل حاجه

ونتج عن ذلك النقاش الوثيقة التأسيسية للمدونين الي هي في البوست الجديد الي بعد ده يا ريت تقراها وانت حتلاقي عكس كلامك خالص

اسعدني حضورك استاذي الغالي
مجنووون

Rannon يقول...

بجد موضوع تحفة لخصت بيه حاجات كتير
منها حاجات خانقاني من التدوين والمدونين

أكتر حاجة بتغيظني اللي مش بيتابع التعليقات والناس اللي بتجامل

وعجبتني فكرة الوثيقة

بجد موضوع هايل ودماغ شغالة صح
تحياتي :)

شمس النهار يقول...

ياسلام الموضوع عجبني قوي ده انت طلعت اعقل واحد في السرايا
ليه عندك طلب ياريت تدخل عندي المدونه وتشوف اول بوست كتبته وبعديه بشويه تشوف بوست مدونين علي طول
هتلاقيني كنت مخنوقه من حاجات حصلت لي وانا لسه يادوب مبتديه وبقول ياهادي
وياريت بعد ماتعمل كده تكتب تعليق علي اللي قريته
*موافقه علي كل كلمه انت كتبتها
تسلم ايدك

Unknown يقول...

انا معاك تماما فيما تقول .. لكن ليا بعض التعقيبات و ربما علامات الاستفهام

* والاقي ناس كتيرة بتعلق وخلاص ليه تهدر وقتك وتهدر حبرك وترد علي حاجه انت مش مقتنع بيها او مفهاش اي فايدة*

هي ممكن تكون تافهه بالنسبالك لكن ممكن تكون بالنسباله مهمه .. و لولا إختلاف الأذواق لبارت السلع

* يبقي بيهرب كأنه هارب من ميدان المعركة ، وكأنه خاين للأمانة العلمية وهايتحاسب عليها يوم القيامة*

أنا معاك انه هروب .. أحيانا .. و أحيان أخري هو ممكن يكون بعد أو إبتعاد عن عالم النت البارد بكل قوانينه و حرياته اللامحدوده..و أما فكرة أنه بيخون الأمانه العلميه .. فمش شرط كل واحد يعرض تجربته للاستفاده منها .. و مفيش حد يقدر يجزم إذا كنا هنتحاسب علي إيه أو مش هنتحاسب علي إيه..!!

*لأنهم مش بيسئيوا لنفسهم وبس ولكن بيسئيوا لعالم التدوين اللي هو أحنا*

عندي سؤال بسيط مين "إحنا" ؟؟ و معتقدش إن "إحنا" مهما كانوا مين إشتروا بلوجر .. و التدوين زي الكشاكيل متقدرش تمنع واحد إنه يشتري كشكول يكتب فيه حتي و إن كان هيكتب أفظع الشتائم و فج الكلام ..لمجرد إنه هيسيء للي بيكتبوا في الكشاكيل عموما !! .. التدوين حريه و اللي مش عاوز يقرالهم ميقرالهمش .. أنا مش معاهم و لكن برضو مش ضدهم .. لأنهم بشر .. و زي ما انا و انت بنغلط .. و لينا لحظات ضعف و ذنوب .. هما كمان زينا .. يمكن منبوذين و مرفوضين .. لأن ما يفعلوه نشمئز منه فرارا .. و لكن هم أكثر الناس حاجة لاحتوائنا لهم .. و علاجهم قد يأخذ عشرات السنين و لكنه موجود و ممكن أوي بمجرد تعليق تغير حياة واحد أو واحده منهم ..

*الــمـدونـيـن الـهــدامـيـن*
انا في رأيي أنهم أكثر واقعيه .. كفاية أحلام ورديه .. أنا مش مع الشتيمه ف البلد و الكلام ده بس مع إننا نرفع الحجاب عن كل خطأ عشان بلادنا تبقي أفضل

*لما نلاقي الغلط قدمنا منتحركش علشان نغيره ونقول في نفسنا هي خربانه خربانه*

بجد تصفيق حاد أحب أشيد بكلامك ده جدا و أنا معاك فيه جدا جدا

************

بالرغم من إني مش مع الوثيقه بأي شكل لكن أنا بحترمها و بحترم أصحاب الفكره و بتمني إنهم يحققوا أهدافها لإنها تستحق :)

محمود حسن العدل يقول...

السلام عليكم
اخىالكريم التدوين دا حرية شخصية
حضرتك مش هاتخترع قوانين وقسم نقسم به
انا بدخل المدونة كلامها حلوة ولية هدف اخدتها فى المفضلة وعلقت على البوست .
دخلت ولاقيت كلام خارج مش بدخلها تانى
اما بالنسبة للتعليقات
مثلا حضرتك دخلت تجملنى بكلمتين وانا بقراء التعليقات هاحس بكدة وردى عليك هايكون على هذا الاساس.
سورى انا اسف مين اللى اخترع القسم دة
وبناءا على اية
انا عارف انك ممكن تقول ان انا مالى مادمت مش موافق .
دا بوست موجود وحبيت اقول وجة نظرى
... طب سؤال الاعضاء اللى موافقين اللى انت كاتبت اسماء مدونتهم فى البوست اللى بعد دة .
اجتماعتم يعنى واخدتم راى بعض ولا مجرد مشاركة فى المدونة .
طيب
الكلام اللى حضرتك بتقولة دا اية الجديد فية ماكلنا قبل ماندخل عالم التدوين فاهمين وعارفين .
اضربى مثل لمدونات هادمة ومش تقول انا لان انا عارف انى تعليقى مش هايعجبك
مش كل الناس عندها القدرة على التعبير على شان تحكم ان الرد دا مجاملة دا غير انى بقولك انك هاتحسى انة مجاملة .
يااخى الكريم المدونة حرية الرائ مش ليها قوانين الا فى حدود الاب وعدم الكلام الخارج ولالفاظ الجارحة.
انا مش بقلل من شان الكلام اللى انت كاتبة بس انا اسف انا مش شايف فية جديد.
ياريت اعرف ردك بدون زعل لان انت عارف ان اختلاف الرائ لايفسد للود قضية
تحياااااااااااااااااااااااااااااااتى

 

M A G N O O O N - إلي بيحب قوي لما بينجرح بينجرح قوي © 2008. Design By: SkinCorner