السبت، نوفمبر ١

مــــــــات الـــــقلـــــم


بـجد مش عــارف هـــو أنــا جيت زمــن غلط ؟


والا أنــا الـــي غــلــط فـــي زمـــــن صـــح ؟


بجد مش عارف مالي النهارده حاسس أني جسمي سقعان قوي


وفي نفس الوقت عرقان قوي ومش عارف العرق ده بيجي منين



وجسمي بينتفض رغـــم أنـــي مـش تـعــبــان

مش عــــــــارف مـخـنــوق قــــــوي النهاردة

يمكن علشان لقيت حاجه بقالي سنيين بدور عليها وفي نفس اليوم راحت من إيدي ؟



يمكن علشان النهارده أول مرة أخالف ميثاق الشرف الي وضعته لنفسي ؟



يمكن علشان لأول مرة أحس أني عملت حاجه بتدل علي أني ندل ؟


يمكن علشان أول مـــرة أحـس بـالـوحدة للدرجــة دي ؟



يمكن علشان مبعرفش أنـــام خــالــص فــــي الـشـتا ؟


يمكن علشان فكرت في لحظة أني أخد حاجه مش بتعتي ؟


والله أنا مش فاهم حاجه خالص لو حد فاهم يبقي يفهمني


بجد مش عارف ليه كل حاجه بضيع مني بسهوله ؟


يمكن أكـون أنـا عبـيط أو أهـبـل وأنــا مـش عـــارف ؟


يمكن مبعرفش ااقدر النعمة إلي أنا فيها وأحافظ عليها ؟


بردو والله مش فاهم حاجه ولو حد فاهم حاجه يا ريت يفهمني


في أوقات بحس أني ضعيف قوي ومقدرش استحمل ااقل الم


وفي أوقات بحس أني قوي جداً وممكن أكسر الدنيا كــلها


وأوقـــات بحس انــي طــايـــر فــــي الـســمــاء


وأوقــات تـانيه بحس أنــي مدفون تحت التراب



وعلشــان دا كـلـه قـــررت قـــرار غــريـب قــــــوي


قـــررت أبطــل أكـتـب شـعــر خــالـــص وتــقــدروا تــقــولـــوا


( فــقـد مــات الــقــلــم )


يمكن علشان مش لاقي حد يستاهل أكتب له الشعر


يمكن علشان بشوف الي جوايا علي الورق وهو أغلي حاجه في الدنيا ملهوش أي لازمه ؟


يمكن علشان لما بشوف الكلام الي بكتبه بحس أني عبيط أو أهبل


علشان الكلام ده خلاص أيامة راحت ومبقاش غير كلام الكدب والغدر ؟


اه علي فكرة أنا قبل ما أبطل أكتب شعر حكتب خمسة قصائد بتعبر


عن إلي جوايا في اليوم ده وأن شاء الله حكتب كل يومين قصيده


ومحدش يسالني ليــه هــم خـمســه ومـهـمش ستة ؟


ومحدش يسالني عنوهم ايه لأني بجد مش عارف ؟


ومحدش يسالني حيتكلموا عن أيه لأني بردوا مش عارف؟


بس متوقع انهم يكونوا غم لأن الأيام دي طلبه غم



بس قولت أكتب خمسه علشان أطلع كل الي جوايا




والي حصلي في اليوم ده 1 / 11 / 2008


وأن شاء الله الخمس قصائد دي حتكون نهاية لحياتي الشعرية


ولو كتبتب في المدونة بعد كده حكتب في حاجات عادية


وههتم بالــمـدونــة التأسيسية للمــدونـيـن



محدش يستغرب من كلامي لأني بجد شوفت يوم غريب وعجيب



ويـمـكــن عــلشــان أنـــا مـجــنـووون


أمضاء


مجنووون

16 نورت مستشفي المجانين:

شمس النهار يقول...

في ايه يابني
انت عقلت والا ايه
ماكنت مجنون وحلو وتمام التمام
اقولك اللي انت فيه ده شئ صحي جدا
اعتبره وقفه مع النفس قصيره
وهتطلع منها بشئ جديد في حياتك
وهي دي النفس البشريه المحيره

غير معرف يقول...

كدا بقيت رسمي

واسم على مسمى

*الطالبة عفو الله *زوزو يقول...

مش عارفة ارد اقول ايه

الي ممكن اقوله حرام عليك تكبس طاقة جواك و تخنق ابداع وهبك الله به

في ناس كثيرة تتمنى تكون ليها القدرة انها تعرف تكتب نص لانت بتكتبه

و حرام عليك تحرف ناس حبت قلمك لما فيه من ابداعاتك

ممكن نكون قابلت ناس مقدرتس لانت بتكتبه

ممكن تكون بتكتب شيء في وقت معين او في حالة معينة و بعد فترة تندم انك كتب

بس كل دة ميعنيش ابدا انك تموت قلمك
طب ذنبه ايه القلم باي حق ستقتله

لا و الف لا

عد النظر في قرارك

mohamed ghalia يقول...

مجنون أخى العزيز
اقف مع نفسك حدد أهدافك شوف انت عايز ايه وقرر بس اهدى بس وفكر .
رجاءمتحرمناش من كتاباتك الرائعة
إنى حبناك من غير معرفة سابقة من كلماتك فمتحرمناش من الكلمات دى
والله الكلام ده مفيهوش مجاملة
تحياتى
ربنا يعينك
اشوفك قريب

blue-wave يقول...

انا مش فاهمك يا مجنون
بس خليك عارف اننا بنكتب علشان نفرغ اللى جوانا
مش علشان خاطر حد
اتمنالك الخير دايما

romansy يقول...

ممكن علشان انت مجنون وصلت لدرجه العبقريه

ولا يهمك
دى حاله بتحصل لاى حد وحصللتى والله
واتاثرت قوى قوى
انت عارف انا لما اكون متضايق بكتب اى حاجه
بشغبط فى الورقه
عارف ليه يمكن الشغبطه دى نرسم اللى جوايا واللى مش عارف اقوله

مجنون
انت جميل قوى

Sweet Violet يقول...

كل انسان بيجى عليه لحظه من الملل و الضيق

لكن القوى هو اللى يقدر يقف مع نفسه صح و يعديها بأقل خسائر

موت القلم مش هو حل و مش هو اللى هايطلعك من اللى انت فيه

و مش هو برضه اللى هيجاوب على الاسئله اللى جواك

انا مش معك فى قرارك بجد فكر و عيد ترتيب حياتك

وردشان smilyrose يقول...

يعنى محتاج حد يفهمك

يابنى دى مش مشكلتك لوحدك كلنا

بيجى علينا وقت نحس بالضياع والغربة

والوحدة والظلم وبالعبط والهبل

عادى دا سمة جيلنا

جيل كئييييييييييييب

هههههههههههههههههههههههههه

بس مش من حقك تحرمنا من كلمات تمثل

للعديد منا شيئا جميل

انت حر واحنا كمان من حقنا نتمسك

بحاجة خاصة بينا مش من حقك توقف

كتابة الشعر لأننا كلنا ارتبطنا

بكلمات مجنون المدونات

ايه دا
انا كدا جبل

بطل وارجع مجنون من تانى

سلالالالالالاموز

smilyrose

روح الحب الصادق

kochia يقول...

كتير بنندم علي قرار متسرع
رغم انه وقتها بيكون قمة العقل

الزمن غالبا بيكون كفيل بعلاج كل شئ

mahasen saber يقول...

طب انتا قلت فى كلامك
يمكن عشان حاولت اخد حاجه مش بتاعتى..
ما يمكن ده اساس كل الحزن والغيوم دى انك تطلعت لشئ مش فى ايدك ومش من حقك انه يبقا فى ايدك ....انا مفهمتش من البوست غير انك حزين فبتمنا ربنا يفك حزنك وكربك وهمك
بس عجبنى على الجانب الاخر موضوع كل يومين قصيده ...
يا رب دايما احزانك تتقلب لشئ ايجابى كده
.............

جوجو يقول...

السلام عليكم

ايه اللى حصل لكل ده

اعتقد ان مفيش سبب يخليك تسيب حاجة بتحبها لالالالالالالالا مينفعش كده والله

مش متعودين على كده

وبعدين والله الحياة فعلا عادت وحشة اوى

بس هنعمل ايه لازم نعيشها

راجع قرارك

تحياتى

princess يقول...

لا لالا مينفعش الكلام ده خالص
لا اله الا الله براحة كده وخليك هادى ورتب افكارك
بجد كلنا بتعدى علينا ايام زى كده بلاش قرارات ملهاش لازمة
الكتابة هتساعدك تفهم ولما تفهم هترتاح
وايه حكاية اهبل دى لو انت هبل كلنا هبل
ولوانت مجنون قلى مين فينا عاقل
دقيقة بس فكر انت رايح فين وجاى منين
حلو اوى حساب النفس بس محدش قال جلد الذات
استعين بالله وان شاء الله خير
تحياتى صديقى العزيز

رؤية يقول...

من منا لا يدور بيتلك الاحوال
وان كنت اخالفك فى سؤلك عن مدى صحة وجودك فى الزمان والمكان التمام
فهذه حكمة الرحمن....
سيدى لا تتخذ قرارا دونما تريث وتفكر
وكثيرا ما نشعر بتلك الاضطرابات ...
فتمهل
مهما كان ما اريتكه الايام...

تحياتى لك.

أمل حمدي يقول...

مجنون ابني

مافيش حد يستاهل

عدي على همومك واوعى تموت قلمك

انت الخسران

الذئاب تعوي.. والقافلة تسير

انا بشك في الدكاترة اللي في المستشفى

دي حالتك مش عاجباني

سمكه واحده يقول...

ايه بس مالك ايه مود الحزن ده
طيب انا قلت ادخل اشوف في ايه لقيت كله حزين انا قلت انا بس لا لقيت كتير
ياله ربنا يفك كربي وكربك وكرب المسلمين يارب
متخدش قرار في وقت غضب مش هيفيدك ابدا بالعكس
ياريت تفكر كويس
تحياتي

fOsDö2ä يقول...

:(
طب ليه كده .. ؟؟!!
دي المدونة عجبتني و حسيت حاجات فيها قوي ...
لدرجة إني مش متخيله إن وجودي فـ مدونتك صدفه ... !!
يوم 1-11 ... ؟؟!!
و رسالة فاصلة ... ؟؟!!
و اللي يحب قوي هو اللي بينجرح قوي .. ؟؟!!
و لسه الباقي ... !!
سبحان الله فعلاً ...
بتفكرني بـ حد أعرفه ... !!
بس ملف التعريف ع الأقل بيقول انك مش الـ حد ده ... !!

ياريت تراجع قرارك تاني ...
و زي مـ كلهم قالوا انك المتضرر الوحيد ...
و انت كاتب فـ ملف التعريف إن المدونة عشان تعبر عن نفسك ...
يبقى لازم تفضل تعبر عن نفسك ...
بغض النظر عن أي حاجه تانيه ...
مستنيين نسمع خبر رجوعك عن القرار ده ...
معلش طوّلت قوي فـ الكومنت ... :(

 

M A G N O O O N - إلي بيحب قوي لما بينجرح بينجرح قوي © 2008. Design By: SkinCorner