الأحد، مايو ٣

رحــلــة صـيــد

أول مرة هتكلم عن حاجه شخصية




الاسبوع الي عدي لقيت صاحبي علاء بيتصل بيا وبيقولي يوم الخميس الي جاي أجازة



أيه رائيك لو نطلع نصطاد ، قولتله والله مشغول قالي لا لازم نطلع نصطاد



قولتله خلاص نطلع وايه المشكله



قالي بس خد بالك أحنا هنطلع شلتنا بس



قولتله يعني أحنا الي هنشيل ثمن المركب كلها قالي أيوه



قولتله طيب يبني ما نطلع مع الناس التانيه ومش لازم نشيل ثمن المركب كلها



قالي لا أنا عايز رحلة لوحدينا قولتله ماشي يا عم لما نشوف أخرتها



المهم اتقبلنا وقولتله علي فكرة الجو الأيام دي مش متظبط خلينا نأجل الموضوع



قالي لا أحنا خلاص دفعنا الفلوس وحجزنا يعني هنروح هنروح



المهم صحيت الفجر واتقبلنا عن المسجد وجات العربيه الي هتخدنا لمكان الصيد

( المكس الي اتمثل فيه فلم بلطيه العايمه )

المهم وأحنا ريحين والجو مش تمام



يبني بلاش قالي يا عم تعال انا سالت المراكبي وقالي أن هو دخل علي النت وقال أن الجو

هيكون كويس قولتله ماشي لما نشوف



ونزلنا من العربيه وكل واحد معاه عدة الصيد والتلاجة بتاعت السمك ..

 ال يعني هنجيب البحر كله



المهم ركبنا المركب وخلاص طلعين البحر



وعيونكم ما تشوف إلي النور



تعرفوا فلم تيتانيك وأزاي المركب بيدخل فيها الميه والموجه عاليه



أنا بقي والي معايا كنا في فلم تيتنك والمركب ماشيه والموج عالي والمراكبي مسرع

علي الأخر



والمركب تطلع وتنزل واحنا طبعا نتهبد معاها والميه تغرقنا وهو برضوا ماشي

ااقوله طب هدي شويه وهو مش معبرني



ودخل بينا في البحر مسافة ساعتين بالمركب عبال ما وصلنا

كان الواحد أتهد حيله وحيل أهله



ووقف في المكان الي هو محدده بيبقي فيه سمك وقعدنا نصطاد



انا وبلا فخر رميت السنارة 4 مرات طلعت خمسة سمكات واليوم كله نايم في المركب أنا

ومعظم الناس الي كانت معانا


وكان في واحد صاحبي نفسه يطلع معايا مرة ولما قبلته تاني يوم وكان زعلان علشان نفضتله ، قولتله أمك بتحبك علشان مطلعتش معانا



وعلي فكرة المركب طولة 15 متر وعرضها 6 متر

نطلع الساعه 6 الصبح والمركب مترجعش غير الساعه 7 المغرب



وطبعا مينفعش نقول نرجع علشان الناس الي بتصطادوا معانا



يعني من الأخر هتقعد بالزوق أو بالعافيه



وعلي فكرة هي رحلة بتبقي ممتعه بس لما يكون البحر هادي




 
امضاء

مجنووون

45 نورت مستشفي المجانين:

حنعيش يعنى حنعيش يقول...

المهم قليت السمك ولا شويتة

سمكه واحده يقول...

مالل انت بقي بالسمك حضرتك هه
تعرف تقولي كده
مالك بقي
مهو السمك ابن حلال اهو
انا مش عارف ايه الحقد بتاع الناس دي بصراحه
انا طول عمري اسمع عن رحله الصيد وبيقولوا انها جميله بس معرفش بصراحه ياله تعيش وتصطاد
تحياتي

GiGi world يقول...

المهم رجعت بالف سلامه
ربنا يكرمك ويعزك
كمل معانا موضوع الحفظ
انت على فكره طالب متعب بس انا مش هسيبه حد يسيب حسنات يعنى جايلاه من غير تعب
مستنين حضرتك

mohamed ghalia يقول...

يارب تكون استمتعت بوقتك
ورحلة تفوت ولاحد يموت

♥نبع الغرام♥♪≈ يقول...

واوا
السلام عليكم
بجد كان نفسى أكون معاكم بالرحله دى
انا من عشاق الصياده
وبمووووووووت فى جميع أنواع الأسماك
بس كويس انك رجعت بالسلامه أنت وزميلك
ربنا يسترها معاك
تحياتى
أختك إيناس

شمس النهار يقول...

حمد الله علي السلامه
يعني انت اصدت خمس سمكات بس
طيب انت رميت السناره اربعه الخامسه دي جت منين :)

اسمع ان الصيد متعه وادمان وعايز صبر
حاولت مره اصطاد وكنا شله كده
وبم اني مااقدرش اقعد في مكان واحد فتر طويله بحب اتحرك ماقدرتش اقعد
جاني ملل

رحلتنا في الحياة يقول...

احلى شئ جو البحر انا لو قعدت اسبوع فى البحر مش همل منه ابدا والاجمل لما تكون الموج عالية حلو ان الانسان يغير جو ويغير روتين حياته

MaNoOoSh يقول...

مش قادرة اقول رحلة سعيدة لان شكلها كانت رحلة عااااااااااااااصفة
ههههههههههههههههه
بس مقلتلناش بقى اصطدت كام سمكة؟

عاشقه الرومانسيه يقول...

انت اسكندرانى؟
مفجئه جميييييله
بس صحيح ازاى اربع مرات ترمى الصناره وتصطاد خمس سمكات؟

blue-wave يقول...

4 مرات وتصطاد خمس سمكات؟
اكيد كانت سمكه واحدة بالعه 4:))

عابرة يقول...

اكيد رحلة ولا في الاحلام وخصوصا مع هيك جو خماسيني
والحمد الله على سلامتكم
وصحتين وعافيه

مـجـنـووون يقول...

حنعيش يعني حنعيش

لا رميته ف يالبحر هههههههه

اسعدني مرورك
مجنووون

مـجـنـووون يقول...

سمكة واحده

انا عرفت انه قريبك قولت اروح اصطاده
طبعا رحلة الصيد جميلة بس لو كان الجو حلو

اسعدني مرورك
مجنووون

مـجـنـووون يقول...

GIGI
الله يسلم قلبك يا رب

انا يشرفني اني اكون من تلاميذ حضرتك

اسعدني مرورك
مجنووون

مـجـنـووون يقول...

محمد غاليه

لك يوم يا ظالم

اسعدني مرورك
مجنووون

مـجـنـووون يقول...

عاشقة الأحزان

وعليكم السلام ورحمة الله وبركاته

خلاص أعمل حسابك المرة الي جايه ان شاء الله

أمين يا رب
شكرا علي الدعاء

اسعدني مرورك
مجنووون

مـجـنـووون يقول...

شمس النهار

الله يسلم قلبك يا رب

موضوع الاربع سمكات

احنا بنصطاد في حاجه اسمها تسقيط
يعني بندخل في البحر مسافة كبيرة وبيبقي الخيط مربوط فيه حوالي 10 صناريعني بنعمل حاجه اسمها سبحة
بمعني انك ممكن في المرة الواحدة تجيبي 10 سمكات او 8 او 7 أو ......

فيعني عادي

الصيد حلو بس لما تكوني مع ناس بتحبي تقعدي معاهم

اسعدني مرورك
مجنووون

مـجـنـووون يقول...

ايوشة

انتي بتتكلمي عن البحر من علي البر
بس صدقيني البحر ملهوش كبير
بس هو بيرح النفوس أكيد

اسعدني مرورك
مجنووون

مـجـنـووون يقول...

منووووووووش

أكيد عاصفة بس الحمد لله

أنتي شكلك مقرتيش كويس

انظري الموضوع مرة تانيه ههههههههه
اسعدني مرورك
مجنووون

مـجـنـووون يقول...

عاشقة الرومانسية

وانتي كمان اسكندرانيه

مش عارف ليه الاسكندرانية مش بيعرفوا بعض في المدونات

موضوع الاربع سمكات

احنا بنصطاد في حاجه اسمها تسقيط
يعني بندخل في البحر مسافة كبيرة وبيبقي الخيط مربوط فيه حوالي 10 صناريعني بنعمل حاجه اسمها سبحة
بمعني انك ممكن في المرة الواحدة تجيبي 10 سمكات او 8 او 7 أو ......

فيعني عادي

اسعدني مرورك أحلي اسكندرانية
مجنووون

مـجـنـووون يقول...

دكتور عمرو

نقول تاني
موضوع الاربع سمكات

احنا بنصطاد في حاجه اسمها تسقيط
يعني بندخل في البحر مسافة كبيرة وبيبقي الخيط مربوط فيه حوالي 10 صناريعني بنعمل حاجه اسمها سبحة
بمعني انك ممكن في المرة الواحدة تجيبي 10 سمكات او 8 او 7 أو ......

شرفني حضورك أخي الكريم
مجنووون

مـجـنـووون يقول...

عابرة

اه والله رحلة مكنتش علي البال ولا الخاطر

الله يسلم قلبك يا رب

شكرا علي السؤال
شرفني حضورك سيدتي
مجنووون

ريمان يقول...

الله اله

انا بجد نفسى فى رحله زى دى

بجد اكيد ممتعه جدا

يا بختتتتتتتتك بجد

ماء تشرين يقول...

طب مش تعزمنا طيب ياعنى تحكيلنا بس
ينفع كده

عموما انا بخاف من البحر جدا ومن المراكب خالص ياعنى الحمد لله على سلمتك

رؤية يقول...

رميت السنارة اربع مرات طلعت خمس سمكات

امممممم
يمكن

عموما
جميل ان الواحد يغير جو

تحياتى لك

yoyo يقول...

صباحك سكر يا مجنون

هواية الصيد هواية جميلة اوى
شىء جميل انك تعمل حاجة بتحبها وتكون مع اصحابك
بصراحة كنت هسال عن موضوع عدد السمك دا ازاى لقيتك فسرتها بقى
ربنا يسعدك يارب و يسعد ايامك
تحياتى
يويو

حسن حنفى يقول...

حمد لله علي السلامه

عارف الرحله مهما كانت متبعه

بس بتسيب ذكري جميله اووي

Hossam يقول...

hahahahahahhaahahahahahahahah
بجد فكرتنى ايام اما كنت بصطاد انا واخواتى بس اما كان اخويا الكبير بيخش البحر بمركب مكنتش بخش معاه واقعد اصطاد من برة.مكنش بحر طبعا كان نيل.اتمتع اوى بالصيد
تحياتى

صمت المشاعر يقول...

الصيد حاجه جميله اووووووووووي بجد

ويارب تكون قليت السمك مش شويته

هههههههه


دمت بكل خير

اسماء واحلام فى وجدانى يقول...

والله جنونك ده مالهوش حل

على كده بقى تعرف على مندى

واسماعيل

احنا بنطلع فى ابو قير

اعوذ بالله كان يوم فظيع مريع زريع

المهم انا دلوقتى صياد ترعاوى

البحر ده للتامل فقط

غير معرف يقول...

الف الحمد لله على سلامتك

انا بحب البحر لكن بخاف منه مووت بنفس الوقت

ولو كنت معاكم كنت هموت على روحي من الخوف بسبب الجو المتقلب

بس مش قليل 5 سمكات (وش متعجب ) بما انكم بتعملوا تسقيط المفروض اكتر كشفتك يا خويا ههههههههههههه

طمنا عنك وايه حكاية الانقطاع

يارب تكون بالف خير وترجعلنا بالسلامة

منتظرينك متتاخرش علينا

ربنا يحفظك

Unknown يقول...

حمدلله على السلامة اولا
وتانيا الصيد ده قسم ونصيب زى الدنيا بالظبط اتنين جنب بعض واحد يرمى السنارة يطلع له بسارياية
والتانى تطلع له بلطياية
قسم ونصيب ولا
انت رايك ايه؟

شهد الكلمات يقول...

يعني انا لسة بشمر و بقول يا هادي و هابتدي ارجع تاني للمدونةو للتدوين و ادخل اشوف مدونتك الاقيك واخد اجازةو مش محددة و شكلها مكتئبة اية خير اية الحكاية
يا رب يكون خير
يا ريت مش تغيب

تحياتي

غير معرف يقول...

نفسي اطلع رحلة زي كده
اكيد ممتعه اوي :)

المهم انك رجعت بألف سلامه

غير معرف يقول...

هتغيب ليه؟؟

وهتروح فين؟

غير معرف يقول...

هتغيب ليه؟؟

وهتروح فين؟

اسماء واحلام فى وجدانى يقول...

مافيش تعليق فوق قلت انزل تحت

علشان اطمن عليك

واقولك ان شاء الله خير

وترجعلنا بالسلامة ان شاء الله

احمد

شهد الكلمات يقول...

انا كدة زعلانة
بقي انا اغيب اغيب و لما ارجع و ابتدي اتابع الاقيك واخد اجازة و مش محددة
طيب اعمل اية منغيرك نبطل كتابة بقي
يارب يكون غيابك خير و تكون كويس
مستنية رجوعك ماتتأخرش

تحياتي

بنت الأسلام يقول...

بس أكيد بيبقى يوم جميل
انا طول عمرى نفسى أطلع أصطاد مرة
بس ان شاء الله أحقهها
وحمد الله على السلامة
تحياتى
تقبل مرورى

غير معرف يقول...

طولت الغيبة علينا

يارب تكون بالف خير

منتظرين عودتك

):

طـائر الليــل الحـزين يقول...

ايه بس
هو انا اغيب شوية
اجى القيك مشيت
على العموم ترجع بالسلامة
ويكون سبب الغيبة خير

غير معرف يقول...

يااارربي وينك

والله قلقتني عليك ووينك لهلأ مختفي

خير يارب لعل المانع خير

الله يخليك طمنا عليك

ربنا يوفقك

ندا منير يقول...

طب ليه كدة ربنا يرجعك بالسلامة ويارب يكون خير

هنستناك ونستنى مواضيعك الجميلة
ياريت متغبش

ايمان روحي يقول...

حمدالله علي السلامه يانستر
وصحتين علي السمك
هههههههههه
بس جد الرحلات مع الاصحاب
رغم الاشياء المتعبه اللي فيها ممتعه
دمت بكل امل
تحيـــتاتي

مهرة سالم يقول...

السلام عليكم....
لو كنت أخذت صديقك إلي نفسه يروح معاك يمكن تحسن الحال ...
خيرها في غيرها...
....
دمت بخير

 

M A G N O O O N - إلي بيحب قوي لما بينجرح بينجرح قوي © 2008. Design By: SkinCorner