الجمعة، يناير ٩

لماذا تتحمل مصر جزء كبير من الذي يحدث في غزة الآن




أحب بس أنوه في الأول أن أنا مجنون ومليش في السياسة ولا بعرف الألف من كوز الدورة بس حبيت أكتب شويه حاجات جنان من إلي أتعلمتها من مسشتشفي المجانين



يلا تعالوا نشوف المجنون كتب أيه



أولاً : التصريحات الغير عقلانيه من أبو الغيط (وزير الخارجيه ) وحسام زكي ( سفير مصر لدي الأمم المتحدة ) والمسئولين الي بيقولوا فيها أن حماس تستاهل الي بيحصل فيهم ولازم يتربوا ويستحملوا نتيجة مقومتهم لليهود واختراقهم للهدنه . مين الي اخترق الهدنة بقي بتوع غزة المحاصرين من 18 شهر ومات منهم 218 واحد بسبب الحصار يبقوا هم الي يستهلوا والا إلي محصرنهم ومجوعنهم



ثانياً : مصر طول عمرها كبيرة وديما بتخدم القضية الفلسطينية والي عملته مصر لغزة قليل قوي عن الدور الي الدنيا كلها منتظرها من مصر في الوقت ده



ثالثا : معبر رفح معبر مصري فلسطيني ولما حماس بتطلب فتح معبر رفح مش معني كده انها بتطلب أن مصر تفتح حدودها وتخلي الفلسطنين يدخلوا مصر ويسيبوا فلسطين ولكن طلبهم لفتح معبر رفح علشان يدخل منه الأكل والشرب والأدوية والبترول المطلوب لتشغيل محطة الكهرباء . ولكن مصر قفلت المعبر خالص وساعدت اليهود في أنهم يعملوا حصار علي غزة ويقضوا عليهم



رابعاً : إلي حماس بتعمله المفروض أحنا نكون مكانهم لأن هم بيحربوا عن المسجد الأقصي إلي هو قبلة المسلمين الأولي والي الرسول قال ( من أراد أن ينظر إلي بقعة من الجنة فلنظر للمسجد الأقصي ) وهي الأرض المباركة إلي سيدنا موسي شق البحر بعصاه علشان يوصل ليها وهي إلي سيدنا عيسي عليه السلام هيتزل فيها ويحارب المسيح الدجال ..



خامساً : في ناس عبيطه لسه بتقول أن أهل فلسطين خونه ويستهلوا الي بيحصل ليهم . لو أهل فلسطين خونه كانوا سابوا أرضهم ومكنش اليهود والأمريكان حربوهم . وبعيدن انتوا مش بترحموا ولا تسيبوا رحمة ربنا تنزل .
سادساً : الناس الي بتقول بلاش نرفع صوتنا ولا نصرخ ولا نعيط ولا نكتب شعر ولا نتكلم من أساسه .. أحب ااقولهم أن ده أضعف الإيمان وأحنا بنعمل كده علشان لو ربنا سألنا يوم القيامة عملتوا ايه لأهل غزة هنقول يا رب الحكام منعونا نروح نجاهد معاهم ونحارب ومقدرناش غير أن أحنا نقف في مظاهرة أو نعيط أو نصرخ



سابعاً : في ناس بتقول ليه ندخل حرب مش بتعتنا . والله لما بسمع الكلام ده ببقي مكسوف ليهم قوي . لأن المسجد الأقصي مش بتاع الفسطنيين لوحدهم دا بتاع كل المسلمين . وكمان الناس الي بتموت في غزة ليهم حق علينا أزاي نشوف أخوتنا وأهلنا كل يوم بيموتوا ومنعملش ليهم أي حاجه



ثامنا : لأزم نبتدي نرتقي بنفسنا ونبطل نفكر في الأكل والشرب واللبس والنوم والجنس والأغاني والأفلام والبطيخ ..... ألخ . لأزم يكون في فكرة في حياتنا نحيا علشانها ونموت علشانها



تاسعا : يا ريت كل وأحد قبل ما يحكم علي الفلسطنيين يحط نفسه مكنهم وأيه الي منتظره من أخواته من الشعوب العربية والمسلمين ويعمله لأهل غزة
****************
وفي الأخر هقول فزورة يا ريت كل وأحد يقول رائه
المحقق بطيخه رأح عند معبر رفح وسمع كلام كتير بيتقال علي المعبر

فستغرب وكان معاه مسئول مصري كبير قوي

فسأل المسئول المحقق بطيخه هو المعبر ده بتاع مين

( الأمريكان - اليهود - الأوربيين )

المسئول الكبير معرفش أيه الأجابة لو حد فيكم عرفها يا ريت يبعت رساله علي مستشفي المجانين ألي أنا عايش فيها ويقول رائيه بصراحه وإلي هيختار أجابة من الي بين القوسين هنديه سيخ حديد من تصنيع مصانع عز




امضاء
مجنووون قرب يعقل من إلي بيشوفه

20 نورت مستشفي المجانين:

♥GeGe♥ يقول...

السلام عليكم

اول تعليق


طبعا يا مجنون احنا بنطالب بمعبر رفح ينفتح ع شان يدخل على اهل غزه الحاجات الاسياسيه الي لازم تتوفر لأي انسان
حماس مقاومه اسلاميه بتحارب اليهود على شان كرامتها وكرامة شعبها وكرامة الامه الاسلاميه

لو صحيح انو احنا خون ما كنا حاربنا اليهود ولا كنا طالبنا بانو ارض فلسطين ترجعلنا احنا بقينا بارضنا لانو هدا حقنا هاي ارض فلسطين مش ارض اليهود

واخر ايشي وبصراحه انا ما بتوقع من حسني مبارك او من اي زعيم عربي انو يقف ويحارب لانو هدول على قولت ليفني وزيره الخارجيه الاسرائيليه انهم من المعتدلين ومبارك مل كان راح يفتح المعبر في يوم الي بموافقة من اسرائيل

ان شاالله بجيء يوم والعرب بتتوحد

تحياتي الك يا مجنون

hager يقول...

للاسف للاسف للاسف مش انت لوحدك عايش في مستشفي المجانين كلنا دخلناها غصب عننا
بالنسبه بقي لمصر ودورها يمكن المره دي مصر اتأخرت شويه بس انا متأكده انها هتأديه .. انا لسه عندي امل وان الخير فينا ان شاء الله

مره دكتور قالنا في المحاضره مصر محطوطه جمب المسجد الاقصي عشان تحميه واللي هيحرره اولاد مصر سواء دلوقتي او بعدين بس دي حقيقه منتظرينها تتحق

بالنسبه لاخر سؤال انا مش هجاوب عليه غير لما اعرف الجايزه ايه :D

عاشقه الرومانسيه يقول...

والله عندك حق فى كل اللى قلته
اهنيك على البوست الجميل ده
والله احنا كمان قربنا نتجن من اللى بيحصل
ربنا يعدى الازمه دى على خير اه هى طولت شويتين بس ربنا يعديها على خير برضه
انا من يوم ما اتولدت وانا اسمع عن قضيه فلسطين
وكبرت وتابعت القضيه وهى لسه مستمره
بقولك ايه؟
اوعى تعقل
دى تبقى مصيبه
ههههههه
تحياتى

شمس النهار يقول...

انت واثق انك مجنون بجد
مااعتقدش بعد السرد الجميل ده انك مجنون
والا اليهود بعملتهم دي عقلوك

أريــــــــــــــــــــج يقول...

السلام عليكم ورحمة الله وبركاته

بارك الله فيك على كلامك و موضوعك الرائع ......والله كلام عين الصواب ومنطقي جدا الذي تفضل به اعقل مجنون

صراحه مللنا من الحروب و المأساة
فقلوبنا مع غزه و نتمنا إن كان بمقدورنا شيء لفعلناه
و إن شاء المولى فسيبين الحق و ستنتصر الأمة الفلسطينية

تقبل تحيااتي واحترامي

حسن حنفى يقول...

العالم كله بقي مستشفي مجانين بس واسعه شويه

للاسف الواحد بقي بيتكسف انه مصري

غير معرف يقول...

أيها المجنون مرتاح البال لانك تعيش في مكان هادء.
اوعه تعقل وتيجي تعيش في الزمن دة .
أولا :- كل الوزراء المصرين والسفراء منساقين كا القطيع لذلك فانهم يتكلمون مالا يغضب غيرهم ويتركون الشعب والعالم العربي .
ثانيا :-لانهم عايزين يقضوا على حماس لانهم اخوان مسلمين أنا مش اخوان بس بقول لك يعني ليه .
ثالثا :- ما احنا كلنا عايزين يقضوا على مين والمصيبة بقى حظ المساكين الفي غزة قاعدين فيها بيموتوا سواء من الحصار أو الحرب لهم الله .
رابعا:- د المفروض بقى .
خامسا :- ودي كمان مصيبة لان الأجيال بتخدها من بعضهم يعني ممكن تتقال لحد يوم ألدين .
سادسا :- أضعف الأيمان ذي ما إنت قلت سيبك من العبط .
سابعا:- أكيد نسيوا قول الله تعالى (واعتصموا بحبل الله جميعا ولا تفرقوا ).
ثامنا :- لازم ياه متاخرة أوي كنا فين من زمان وعلى فكرة حنفضل نقول لازم ومفيش حاجة ألا في حالة وحدة لو الشعب فاق من الغيبوبة الهوا فيها وأنا من الشعب أنا عارف .
تاسعا:- هنتظر زي ما هما منتظرين وأكتر كمان .
الفزورة ممكن تحذف اجابتين .
لك مني التحيه وعذرا للاطاله .
أخوك .

princess يقول...

مبدئي اوعى تعقل لانك لو عقلت هتبقى محنون:D
طبعا مش فاهم حاجة ولا انا هههههه
على فكرة كل النقط اللى ذكرتها دى اذا كان فى ناس مصدقاها اعذرهم لان مثلا فى جيل كامل اتولد اتقالوا ان الفلسطنيين باعوا ارضهم فى منهم اللى صدق وفى منهم الى حاول يدور على الحقيقة
اما عن باقى النقط فشوف وسائل اعلامنا اللطيفة بتقول ايه بتردد كل يوم نفس الكلام تقريبا الشعب هيمتحن فيه:))
اللى الناس ناسيه ان حتى لو الفلسطنييين فيهم العبر(نفترض كده) اسلامنا بيقول لازم المسلمين يقفوا جمب بعض طالما ان مفيش حد بيبغى على حد تانى بس كده
يا رب نفوق بقى

رؤية يقول...

الاجابة مش ولا واحد من دول

الاجابة كلهم!!!

تحياتى

Heba Sayed يقول...

السلام عليكم

مش عارفه ليه كاتب مجنون بس

ولون كلامك منطقى جدا..عقلانى جدا

فما السر فى هذا الاسم ؟؟ده اولا


ثانيا : بالنسبة لحوار غزة انا عمالة اعمل تغطية عندى بالمدونة معرفش انت شوفتها ولا لا

هو موضوع المعبر لو اتفتح هيبقى اكثره فرار من الصواريخ وليس لدخول الطعام والشراب

لان من خطط اسرائيل فى 48 هو تهجير الفلسطنيين من قطاعات شتى

بس هو اللى لازم يحصل الطواقم الطبية توصل لغزة والاكل والشرب وده مبيحصلش لان كل الحاجات دخلت معبر رفح المصرية ولكن لم تمر حتى الان عبر رفح المحتلة لداخل غزة

الله يعينهم وينصرهم وينصر امتنا الاسلامية بالكامل

وردشان smilyrose يقول...

السلام عليكم ورحمة الله

اخبارك اخى احمد

وليس مجنون

نعم فتلك الكلمات لا تخرج من مجنون

وانما من انسان يعقل ما يدور حوله

ويؤرقه ما يحدث فى احوالنا

ولكن هناك امل فرسولنا الكريم

قال الخير فى وفى امتى الى يوم الدين

نعم فالخير فينا وفى بلدنا مصر

وسوف تؤدى ونؤدى معها ما كتبه

الله علينا ولكن ما علينا سوى

الصبر الى ان يحين الموعد الذى كتبه

الله علينا

موضوع رائع احمد

smilyrose

روح الحب الصادق

فارس القمر يقول...

بما انى مش هتكلم فى الامور دى لانى بجد تعبت منها وتعبت اعصابى الا انى هقول

حسبى الله ونعم الوكيل

ان لله وان اليه راجعون

والمعبر مصرى

لاهو يهودى ولا امريكى ولا هو اوربى

واللى يقول غير كدا مبروك عليه حديد عز كلوا

الاانك قولت السؤال واختياراته ببراعه

حتى تختلف الاراء

انما هو مصرى مصرى

انسانةعادية فى عالم مش عادى يقول...

سلمت يمينك ربنا يباركلك يارب
الكلام ده قمة العقل ربنا يكرمك يارب فعلا البوست صريح ووضح القضية كلها بس اللى يسمع ربنا ان شاء الله هينصر حماس وينصر المجاهدين ويجعل كيد الاعداء فى نحورهم ونحور اعوانهم العرب الخونة

Hanan Elshafey يقول...

مصر بتتحمل عشان هي الكبيره
عشان هي اللي المفروض تتحرك
عشان هيا اللي في ايديها الحل
عشان احنا مسؤلين عن اخواتنا
بس علي فكره يعني
الجنون قمة العقل
مش كده ولا ايه
وبعدين الفزوره دي سهله اوي

بسيطه يعني



حلها




عم الحج بتاع البقاله اللي بيورد للناس دي كلها



دمت مبدع ومجنون

إبن مصر يقول...

السلام عليكم اخى الحبيب

انا بكلمتين فى البوست الحالى بتاعى قلت الحل اللى يشيل مصر من المسؤليه اللتى تتحملها مصر
وهى فتح المعبر قطع العلاقات وتوقف تصدير الغاز اللى القضاء الإدارى حكم اكتر من مره بمنع تصديره ليهم
وكده يكون اترفع جزء ولو بسيط من على عاتقها اما الباقى على العرب اجمع

نيجى للفزوره
المفروض انها اختار إجابه من تلاته
انا بصراحه مش شايف إنك حطيت بين القوسين غير حاجه واحده
( الأمريكان - اليهود - الأوربيين )
ودول بيساوى
العدو الأول للعرب يعنى كلهم وااااااااااحد
تحياتى اخى

البت المشمشية حلوة بس شقية يقول...

انا مش هختار اجاباة واحدة
انا كل الاجابات دى
على فكرة مدونتك عجبتنى اوى
وشكرا على زيارتك ليا
ويارب متكونش الاخيرة

mahasen saber يقول...

مجنون يا اخويا مصر عشان هيا
الاخت الكبيره من حيث الموقع والمنشأ والحضاره والمصب
وقوة معدن شعبها
فطبيعى طبيعى بلد بالصفات دى يطلب منها المزيد والمزيد

بس خلاص ... يقول...

والله يامجنون كلامك عين العقل ياريت الناس كلها تتجنن زيك علشان نعيش كلنا فى نعيم

"عبير النجار "نيجار يقول...

بجد مدونتك رجعت ونورت الدنيا يا مجنون ،
أعذرني جايه متأخره شويتين :)
وبجد بوست رائع
ومش عارفه أقول ايه بجد
كل ظالم وله نهايه
تحياتي لك أخويا الغالي

*^*AL.7aAzZeEnN*^* يقول...

السلام عليكم

موضوع جميل اووووي

كلمات ذهبيه و معبره على اشياء كثيره

بوست مميز و رائع الجمال

و يارب تستمر في اداءك الجميل ده


تحياتي

القلب المنكسر

دمت بكل خير و سعاده

سلاااااااااااااااام

و اخر سوري حاجه مش فاكر هههههههههه

 

M A G N O O O N - إلي بيحب قوي لما بينجرح بينجرح قوي © 2008. Design By: SkinCorner